Qazaqstan – Iran: Yntymaqtastyqtyń jańa kókjıegi

Jaqynda «Qazaqstan temir joly» UK» AQ-tyń delegasııasy kompanııa prezıdenti Asqar Mamınniń basshylyǵymen jumys saparymen Iranda bolyp qaıtty. Tegeranda QTJ basshylyǵy Iran kólik salasynyń birqatar vedomstvolary men kompanııalary basshylarymen ekijaqty kezdesýler ótkizip, kelissózder júrgizdi. «100 naqty qadam» baǵdar­lamasyn júzege asyrý sheńberinde Qazaqstandy halyqaralyq kólik-kommýnıkasııalyq aǵynǵa ıntegrasııalaý men «Eýrazııalyq transqurlyqtyq dáliz» mýltı­modaldyq kólik dálizin qurý boıyn­sha kelissózder nátıjeli aıaq­taldy. «Social Security Investment Company» (SHASTA) kompanııasynyń bas dırektory Seıed Muhammad Reza Aıatol­lahımen iskerlik kelissóz bary­synda Bander-Abbas teńiz portynda birlesip termınal jáne Túrikmenstan men Iran shekarasynda ornalasqan Inchebýrýn stansasyna jaqyn jerde qur­ǵaq port qaǵıdaty boıynsha ınfra­qurylymdar nysandaryn salý máseleleri talqylandy. Atalǵan termınaldyq jobalar logıstıkalyq ınfraqurylymdar qalyptastyrýǵa jáne Parsy shyǵanaǵy porttarynan tranzıttik jáne eksporttyq júkter úshin jiberý núktelerin qurýǵa baǵyt­talatyn bolady. Jumys sapary sheńberinde «Raja Rail Transportation Co» kom­panııasynyń bas dırektory Hasan Musavınejadpen kelissóz ótkizildi. Oǵan «Patentes Talgo S.A» kompanııasynyń prezıdenti Karlos Palasıo Orıol qatysty. Kelissóz barysynda Irandaǵy jolaýshylar tasymalyn damytý baǵdarlamasy sheńberinde «Tulpar-Talgo» JShS shyǵaratyn jańa úlgidegi 200 jolaýshylar vagonyn satý týraly ýaǵdalastyqqa qol jetkizildi. Iran Islam Respýblıkasy temir jolynyń bas dırektory Mohsen Pýr Seıed Agaımen kezdesý kezinde 2016 jyly Qazaqstan men Iran arasyndaǵy tasymal kólemin 2,5 mıllıon tonnaǵa deıin jetkizý boıynsha belgilengen jos­parlar máselesi qarastyryldy. Taraptar Qazaqstan – Túrikmenstan – Iran jańa halyq­ara­lyq temirjol jelisi boıyn­sha tasymal kólemin óristetý úshin ońtaıly tarıftik jaǵdaı qalyptastyrý týraly oń nıetter bar ekenin qýattady. Qytaıdan Iranǵa turaqty negizde konteınerlik poıyzdardy uıymdastyrý jáne ótkizý máseleleri talqylandy. Taraptar Qazaqstan men Iran temirjol tarıhyndaǵy alǵashqy konteınerlik poıyz ótkizilgenin zor qanaǵat sezimimen atap ótti. Atalǵan poıyz Qytaıdyń Ivý qalasynan shyǵyp, Iran astanasy – Tegeranǵa atbasyn tiregen bolatyn. Marshrýttyń uzaqtyǵy 9 myń shaqyrymnan asady, al júkti jetkizý merzimi – 14 táýlik. Bul júkti teńizben jetkizgennen áldeqaıda az (30 kúnge deıin). Kezdesý barysynda Reseı eksportyn О́zen – Bereket – Gorgan temirjol tarmaǵy arqyly Iranǵa jetkizý baǵytyndaǵy jumystardy belsendilendirý máselesi de talqylandy. Saýda aǵyndaryn, atap aıt­qanda, Irannyń azyq-túlik taýarlary eksportyn Qazaqstan men Reseı naryqtaryna jetkizýdi qamtamasyz etý boıynsha ýaǵdalastyqtarǵa da qol jetkizildi. Bul úshin «Qazaqstan temir joly» UK» AQ-tyń refrıjeratorly konteınerler parkin paıdalaný jóninde kelisim jasaldy. Budan bólek, temirjol mashı­nalaryn jasaý salasyndaǵy ynty­maqtastyqty damytýdyń pers­pektıvalary, Iran temir jolymen «Evolution» serııasyndaǵy 150 loko­motıvti, 70 jolaýshylar elek­tro­vozyn, 5 myń júk vagondaryn, relster men relsterdiń jo­lyn aýystyrý qurylǵylaryn eksporttyq jetkizý boıynsha ynty­maq­tastyqty arttyrý jaıy talqylandy. Kelissózder qorytyndylary boıynsha tıisti hattamaǵa qol qoıyldy. Sáýlebek BIRJAN.