Jaqsarǵan jarııa etý jumysy

Elimizde 2015 jyldyń jeltoqsany men 2016 jyldyń qańtar aıy aralyǵynda 160 mlrd. teńgeden astam aqsha zańdastyrylǵan. Bul týraly keshe Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda málim boldy. Baspasóz máslıhatynda elimizde júrgizilip jatqan zańdastyrý jaıy talqylandy. Oǵan Qarjy mınıstrligi Memlekettik kirister komıtetiniń Damý jáne jańǵyrtý departamenti dırektory Erjan Birjanov jáne Táýekelder, taldaý jáne statıstıka basqarmasy basshysynyń orynbasary Erlan Saǵynaev qatysty. «Zańnamaǵa engizilgen ózgeris­ter óz tıimdiligin kórsetti. Eki aıda zańdastyrylǵan aqsha 160 mlrd. teńgeden asty. Iаǵnı, ol 2015 jyldyń 1 jeltoqsanyndaǵy kórsetkishten 2,5 ese ósti. Bul óte jaqsy kórsetkish dep esepteımin, engizilgen jańashyldyqtardyń nátıjesiniń aıqyn aıǵaǵy», deıdi E.Birjanov. Aıta keteıik, kapıtal men múlikke raqymshylyq jasaý aksııasy 2014 jyldyń qyrkúıeginde bastalǵan bolatyn. Taıaýda osy rásimdi jeńildetý úshin tıisti zańnamaǵa birqatar túzetýler engizildi. Naqtyraq aıtqanda, 2015 jylǵy 13 qarashada tıisti zańǵa qol qoıylyp, 2015 jyldyń jeltoqsanynan bastap zań qol­danysqa engizildi. Aqshany jarııa etý rásimi túbegeıli ońaı­latyldy. Iаǵnı, talaptar biraz jeńildetildi. Nátıjesi ótkizilip jatqan aksııanyń qarqynyn jaqsartyp otyr. «Endi aqshany eki tásilmen zańdastyrýǵa bolady. Birinshisi – olardy bank shottary arqyly kórsetý jáne óziniń kez kelgen muqtajdyqtaryna paıdalaný. Mysaly, bızneske salý, jyljymaıtyn múlik satyp alý jáne t.b., jáne jaı ǵana bank shotynan alýǵa bolady. Osynyń barlyǵy 10 paıyz alymdy tólemeı júrgiziletin bolady», dedi departament dırektory. Ekinshi tásil – shetelde ornalasqan nemese qolma-qol aınalymdaǵy aqshany ótinish berý nysanynda, bank shotynda kórsetpeı-aq zańdastyrýǵa bolady. Biraq bul rette bıýdjetke 10 paıyz alym tólenedi. Osy jáne basqa jaǵdaıda da jarııa etý sýbektisi memlekettik kirister organyna tıisti deklarasııany tapsyrady. Múlikti jarııa etý rásimderi eleýli ońaılatyldy. Endi Qazaq­stan aýmaǵynda ornalasqan jáne tıisti túrde resimdelgen múlikti zańdastyrý úshin mem­lekettik kirister organdaryna tıisti deklarasııany jáne ilespe qujattardy tapsyrý jetkilikti. Osy jaǵdaı shetelde ornalasqan múlikti jarııa etýge de qatysty. Jarııa etý sýbektilerine qosymsha kepildikter berildi. Múlikti jarııa etýmen baılanysty kez kelgen málimetter banktik jáne salyqtyq qupııa bolyp tabylady. Sondaı-aq, jarııa etilgen múlik tárkilenýi múmkin emes. Qarjy mınıstrliginiń Memle­kettik kirister komıtetiniń máli­metine súıensek, jarııa etý bastalǵannan beri barlyǵy 704 mlrd. teńge jarııa etilgen. Onyń ishinde Qazaqstan Respýblıkasynyń aýmaǵyndaǵy múlik boıynsha 498 mlrd. teńge somaǵa, Qazaqstan Respýblıkasynyń aýmaǵynan tys ornalasqan múlik boıynsha 1 mlrd. teńge somaǵa, aqsha 191 mlrd. teńge somasyna jarııa etilgen. Dınara BITIKOVA, «Egemen Qazaqstan».