Memleket basshysy Esep komıtetiniń tóraǵasyn qabyldady

ASTANA. 24 aqpan. Elbasy Respýblıkalyq bıýdjettiń oryndalýyn baqylaý jónindegi esep komıtetiniń tóraǵasy Qozy-Kórpesh Jańbyrshındi qabyldady. Bul týraly akorda.kz habarlady. Qozy-Kórpesh Jańbyrshın Memleket basshysyna Esep komıtetiniń 2015 jylǵy jumysynyń negizgi nátıjeleri, bıýdjet qarajatyn josparlaý men paıdalanýda únemi kezdesetin problemalar, sondaı-aq, aldaǵy kezeńge arnalǵan mindetter týraly baıandady. Qazaqstan Prezıdenti byltyr qabyldanǵan «Memlekettik aýdıt jáne qarjylyq baqylaý týraly» zańnyń júzege asyrylýyn jáne memlekettik aýdıtke tıimdi túrde kóshýdi qamtamasyz etýdi tapsyrdy. Nursultan Nazarbaev buǵan qajetti jaǵdaılar jasalǵanyn, Komıtet mártebesi kóterilip, maqsattarynyń aıasy keńeıtilgenin, tıisti mamandardy qaıta daıarlaý júrgizilip jatqanyn aıtty. Sonymen qatar, Memleket basshysy aýdıttiń qarjy máselelerin ǵana emes, organ qyzmetiniń tıimdiligin barlyq baǵytta baǵalaýdy da qamtýy tıistigine nazar aýdardy. Qozy-Kórpesh Jańbyrshın byltyr Esep komıteti 303 nysanda 29 baqylaý sharasyn júrgizgenin málimdedi. Anyqtalǵan qarjylyq zań buzýshylyqtar qunynyń kólemi 2014 jylmen salystyrǵanda 3 ese ulǵaıyp, 1,3 trıllıon teńge bolǵan. Baqylaý sharalarynyń nátıjesi boıynsha orny toltyrylýǵa tıis 128,8 mıllıard teńgeniń 87,2 mıllıard teńgesi ótelgen. Esep komıtetiniń tóraǵasy júrgizilgen tekserýler men baqylaý-taldaý sharalary qorytyndysy boıynsha Úkimetke jáne basqa da baqylaý nysandaryna 46 usynym men 180 tapsyrma joldanǵanyn aıtty. Bul oraıda usynymdar men tapsyrmalardyń oryndalýy tıisinshe 98 paıyz jáne 95,8 paıyz boldy. Qozy-Kórpesh Jańbyrshın bıýdjettik jáne basqa zańnamalardy buzǵany úshin 75 zańdy tulǵa jáne 66 laýazymdy tulǵa ákimshilik jaýapkershilikke, 271 laýazymdy tulǵa tártiptik jaýapkershilikke tartylǵanyn atap ótti. Quqyq qorǵaý organdaryna baqylaý sharalaryna qatysty 40 materıal berildi. Esep komıtetiniń tóraǵasy Astana jáne Almaty qalalarynyń, sondaı-aq, oblystardyń revızııalyq komıssııalarynyń 2015 jylǵy qyzmetiniń negizgi nátıjeleri týraly da baıandady. Memleket basshysy kezdesý qorytyndysy boıynsha memlekettik aýdıt jáne qarjylyq baqylaý organdary qyzmetin jetildirý jóninde birqatar naqty tapsyrma berdi. Elaman Qońyr. Derek, sýret: akorda.kz.