Máslıhattar depýtattyǵyna 10 825 kandıdat tirkeldi

Keshe Ortalyq saılaý komıssııasynyń múshesi Ma­rat Sársembaev barlyq deń­geıdegi máslıhattar de­pý­tat­tyǵyna kandıdattardy tirkeý­diń qorytyndylary jáne olardyń úgit naýqa­ny­nyń bastalǵany týraly brıfıng ótkizdi. Brıfıng­te ol BAQ ókilderin saı­laý naýqanynyń atal­ǵan ke­zeńiniń jalpy qorytyn­dylarymen tanystyrdy. Marat Sársembaevtyń atap ótkenindeı, Qazaqstan Respýb­lıkasy máslıhattary depýtat­tarynyń kezekti saılaýyn ázirleý men ótkizý jónindegi negizgi is-sha­ralardyń kúntizbelik josparyna sáıkes 2016 jylǵy 23 aqpanda más­lıhattar depýtattyǵyna kandıdattardy tirkeý aıaqtaldy. Jalpy, res­pýblıka boıynsha okrýgtik saılaý komıssııalary barlyq deńgeıdegi máslıhattar depýtattyǵyna 10825 kandıdatty tirkedi. Osy­laısha, ortasha básekelestik bir depýtattyq mandatqa úsh úmit­ker­den kelip otyr. Tirkelgen kandıdattardyń 1592-si oblystyq máslıhattarǵa, 121-i Astana qalasynyń más­lı­hatyna, 130-y Almaty qalasynyń máslıhatyna tirkeldi. Aýdandyq máslıhattar depýtattarynyń mandattaryna 6862 kandıdat, al qalalyq máslıhattarǵa 2120 kan­dıdat úmitker. Tirkelgen kan­dıdattardyń 3407-sin saıası partııa­lar, 17-sin qoǵamdyq birlestikter usynǵan, 7401 kandıdat ózin ózi usynǵandar. «2012 jylǵy saılaýmen salys­tyrǵanda, tirkelgen kandıdat­tar sany 2016 jyly 1660 adam­ǵa kóbeıdi, ıaǵnı jergilikti ókil­di bılik organdaryna saılaýda bizdiń azamattardyń elek­to­rattyq belsendiligi edáýir ósti. Búginnen, ıaǵnı 24 aqpannan bastap máslıhattar depýtattyǵyna tir­kelgen kandıdattar úgit jumysyna kirisedi. Barlyq 10 825 kandıdat óz saılaýaldy baǵdarlamalaryn usynyp, saılaýshylar daýsy úshin saılaý zańnamasynyń sheńberinde ádil básekeli kúres júrgizetinine senim bildiremiz», – dedi Ortalyq saılaý komıssııasynyń múshesi M.Sársembaev.