Dańq tuǵyrynda

Balýan Dáýlet Nııazbekov Azııa chempıondyǵy ataǵyn qorǵap qaldy Taıland astanasy – Bangkok qalasynda kúres túrlerinen kezekti Azııa chempıonaty aıaq­taldy. Jarystyń alǵashqy kún­i grek-rım kúresinen 75 kı­lo salmaq dárejesinde el namysyn qorǵaǵan balýanymyz Dosjan Qartyqov qurlyq chempıony atanǵanyn buǵan deıin habarlaǵan edik. Sońǵy kún de Qazaqstan quramasy úshin sátti boldy. Atap aıtqanda, erkin kúresten 61 kılo salmaqta syn­ǵa túsken Dáýlet Nııazbekov qorjynǵa altyn medal saldy. Osylaısha, ol qatarynan ekinshi ret óz salmaǵynda Azııa­nyń myqtysy atanyp otyr. Otandasymyz alǵashqy bel­desýinde Sırııa senim artqan balýandy 10:0 esebimen jeńdi. Jartylaı fınalda dál osyndaı eseppen Qytaı sportshysynan basym tústi. Al fınalda ırandyq Behnam Ihsanpýrmen kúsh synasty. Ár ádisin aqylǵa salyp jasaǵan balýanymyz ony da 10:0 esebimen utyp, aıqyn basymdyq tanytty. Osy rette Dáýlettiń byltyr Dohada ótken Azııa chempıonatynyń sheshýshi beldesýinde de dál osy Iran balýanymen kezdesip, jeńiske jetkenin atap ótken jón. Qurlyq birinshiliginiń jal­py qorytyndysy boıyn­sha qazaqstandyq balýandar 17 me­dalǵa qol jetkizdi. Naqty aıtar bolsaq, grek-rım kúresinen – 1 altyn, 1 kúmis, 4 qola, áıelder kúresinen – 3 kúmis, 2 qola, al erkin kú­resten 1 altyn, 3 kúmis já­ne 2 qola júlde qorjynǵa tústi. Nátıjesinde, Qazaqstan quramasy múmkin bolǵan 240 upaıdan 167 upaı jınap, jalpykomandalyq esepte top jardy. Bul tizimde 2-orynǵa 144 upaımen Iran quramasy jaıǵassa, úzdik úshtikti 138 upaı jıǵan Qytaı komandasy túıindedi. Taǵy bir aıta ketetin jaıt, balýandarymyzdyń Bang­koktegi tabysy quramanyń sońǵy 23 jyldaǵy eń joǵary jetistigi retinde tirkeldi. Osy ýaqyt aralyǵynda qur­lyq birinshiliginde mundaı ná­tıje kórsetpegen Qazaqstan byltyrǵy Azııa chempıonatynda 12 medalmen shektelgen bolatyn. Elaman QOŃYR, «Egemen Qazaqstan».