О́zi – múgedek, júregi – jomart

Nııaz Súndetálıev 5,5 mıllıon teńgeni qaıyrymdylyq qoryna aýdardy Adamzat balasyn súıý úshin adamnyń on eki múshesiniń saý bolýy tipti de mindetti emes eken. Muny óziniń múbárak isimen Nııaz Súndetálıev esimdi 26 jastaǵy qaraǵandylyq jigit taǵy bir márte dáleldep berdi. Nııazdyń ózi osydan tórt jyl buryn aýyr jaraqat alyp, múgedekter arbasyna tańylǵan bolatyn. Sol kezde jap-jas jigittiń basyna tóngen baqytsyz jaǵdaıǵa shyn qynjylǵan dostary men týys­tary túrli aksııalar men fleshmobtar uıymdastyryp, qarjy jınas­tyrǵan. Al búgingi kúni Nııaz bolsa, elimizdiń túkpir-túk­pi­­rindegi qaıyrymdy jandar­dan kelip túsken sol qomaqty qarjy – 5 mıllıon 584 myń 504 teńgeni Arýjan Saıynnyń «Meıi­rimdilik» erikti qoǵamy» qory­nyń esep-shotyna aýdaryp jiberdi. – Bul aqshanyń jaqyn arada ózimdi emdeýge qajet emestigine kózim jetti. Al ony jambastyń astyna qur basyp otyrý adam­gershilikke jatpaıtyn qylyq bolar edi. Sondyqtan, men bul aqshany dál búgingi kúnde emge zárý balalarǵa kómek retinde Arýjan Saıynnyń qoryna aýdarý jóninde sheshim qabyldadym. Júregi meıirimge tunǵan jas jigit óziniń erteńine senimdi. – Meni emdeıtin dáriger men klınıka tabylǵan kezde, barlyq túıin óz retimen sheshiledi dep oılaımyn. Men buǵan senimdimin. Eń bastysy, kúni erteń ózimniń júrip ketetinime tıtteı de kúmánim joq. Sondyqtan, men eshqashan da un­jyr­ǵamdy túsirmeımin, – deıdi Nııaz. Budan bólek, Nııaz Súndetálıev bıylǵy jyldyń 1 qańtarynan 23 aqpanǵa deıin jınalǵan qaıy­rymdylyq qarjysyn Qaraǵan­dydaǵy múmkindigi shekteýli ba­lalarǵa kómek kórsetetin orta­lyq­tyń esep-shotyna aýdarýǵa sheshim qabyldady. Bir qyzyǵy, Nııaz Arýjan Saıynmen telefon arqyly sóı­les­­keninde óziniń múgedekter arbasyna tańylǵany týraly tis jarmaǵan eken... Qaırat ÁBILDINOV, «Egemen Qazaqstan». QARAǴANDY.