ASTANA. 25 aqpan. Búgin ÝEFA Chempıondar lıgasynyń 1/8 fınaly sheńberinde taǵy eki oıyn oınaldy. Ýkraınanyń «Dınamosy» óz alańynda Anglııanyń «Manchester Sıtı» komandasynan 1:3 esebimen jeńilse, PSV – «Atletıko» matchynda gol soǵylǵan joq. Bul týraly egemen.kz tilshisi habarlady.
«Dınamo» (Kıev, Ýkraına) – «Manchester Sıtı» (Manchester, Anglııa) 1:3
Goldar: Vıtalıı Býıalskıı 58 – Serhıo Agýero 15, Davıd Sılva 40, Iаıa Týre 90.
Ýkraına astanasy – Kıev qalasyndaǵy «Olımpııskıı» stadıonynda ótken bul kezdesýde aǵylshyndardyń favorıt bolǵany sózsiz. Soǵan qaramastan, «Dınamo» oıynshylary aıtarlyqtaı qarsylyq kórsetti. Matchtyń esebi 15-mınýtta ashyldy. Iаıa Týreden pas alǵan «Manchester Sıtıdiń» shabýylshysy Serhıo Agýero alǵashqy goldyń avtory atandy. Al úziliske 5 mınýt qalǵanda Davıd Sılva mergendigimen kózge túsip, esepti eseledi.
Ekinshi taımda, dálirek aıtqanda, 58-mınýtta alań ıeleri Vıtalıı Býıalskııdiń kómegimen bir dop soǵyp, esep aıyrmasyn qysqartqan bolatyn. Degenmen, kıevtikterdiń tarazy basyn teńestirýge shamalary jetpedi.
Oıynnyń núktesin 90-mınýtta Iаıa Týre qoıdy. Fernandınodan pas alǵan ol joıqyn soqqy jasap, qarsylastar qaqpasyna úshinshi dopty engizdi.
Osylaısha, syrt alańda eki dop aıyrmasymen jeńiske jetken anglııalyqtar shırek fınal máselesin jartylaı sheship qoıdy. Endi komandalar 16 naýryzda «Manchester Sıtıdiń» alańynda qarymta kezdesý ótkizedi.
PSV (Eındhoven, Nıderlandy) – «Atletıko» (Madrıd, Ispanııa) 0:0
Bul oıynda «Atletıko» barlyq statıstıkalyq kórsetkish boıynsha basym boldy. Toptyq kezeńde «Astanamen» bir topta bolǵan ıspanııalyqtar oıyn barysynda 11 ret qarsylastar qaqpasyn nysanaǵa alǵan eken. Al alań ıeleri 5 soqqymen qarymta qaıtardy. Sondaı-aq, dopqa ıelik etý kórsetkishi boıynsha da qonaq komanda ozyq boldy (59 % – 41%). Alaıda, «Atletıko» oıynshylary PSV-nyń saýatty qorǵanysyn buzyp óte almady.
Odan bólek, 68-mınýtta alań ıeleri sapynan Gaston Pereıronyń ekinshi eskertýine baılanysty alańnan qýylǵanyn eskersek, Ispanııadan kelgen komandanyń jeńiske jetý múmkindigi qanshalyqty joǵary bolǵanyn ańǵaramyz. Degenmen, 10 oıynshymen júrip qaqpalaryna gol jibermegen nıderlandylyqtar óz jankúıeleri aldynda namysty qoldan bermedi. Atalǵan matchtyń taǵdyry 16 naýryzda Madrıdte ótetin qarymta kezdesýde sheshiledi.
Elaman Qońyr.
Derek: egemen.kz.
Sýret: championat.com, instagram.com.
