Aqseleý álemine saıahat

El tarıhyn zertteýge eleý­li úles qosqan azamattar az emes. Solardyń ishinde izde­ni­si ilgeri tulǵalardyń biri Aqseleý Seıdimbek desek artyq aıt­qan­dyq bolmas. Keshe Astana jurt­shylyǵy asyl azamatyn esine alyp, bir sát ótkenge kóz tastady. – Aqseleý Seıdimbektiń azamat retindegi bolmysyn aı­ǵaq­taıtyn aıqyn qasıetteri­niń eń bastysy – onyń jaltaq­syz ultjandylyǵy. Bul ultjan­dylyq áıteýir, bir ultqa tıesili bolǵandyqtan qıqýǵa ilesetin pendeshilikten ada, halqynyń qadir-qasıetin tereń tanyp-túsinýden týyndaǵan qurbanshyl ultjandylyq. Sodan da bolýy kerek, ol óziniń ǵylymı-shyǵar­mashylyq izdenisterinde udaıy ulttyń rýhanı dáýletin eselep, buryn iz túspegen sonyǵa qulash uryp, jańalyqqa jarshy bolyp, ásirese, halyq murasynyń elenbeı jatqan syrlaryn túgendep otyrýǵa aıryqsha qushtar boldy. Onyń eńbekteriniń udaıy «qazaq» dep bastalyp otyratyny da kóp jaıtty ańǵartsa kerek: «Qazaq álemi», «Qazaqtyń qara óleńi», «Qazaqtyń kúı óneri», «Qazaqtyń aýyzsha tarıhy», t.b. Sóz joq, osy atalǵan eńbekterdiń qaı-qaısysy da tegeýrindi de tyń oı-tujyrymdarymen qazaqtanýǵa olja salǵan, eshqashan ǵylymı-tanymdyq mánin joımaıtyn ómirsheń dúnıeler, – degen Qoıshyǵara Salǵaranyń pikiri Aqańnyń azamattyq tulǵasyn ańǵartsa kerek. Atalǵan sharaǵa fılologııa ǵylymdarynyń doktory, professor Seıit Qasqabasov, túr­kolog ǵalym Sartqoja Qarjaý­baıuly, «Egemen Qazaqstan» respýblıkalyq gazeti» AQ prezı­denti Saýytbek Abdrahmanov, Qazaqstannyń eńbek sińirgen qaıratkeri Sultan Orazalın qatysyp, Aqseleýdiń erligi men órligine, seriligine toqtaldy. Olardyń eske alý keshine erekshe daıyndyqpen kelgenderi áserli áńgimelerinen baıqalyp turdy. Tereń tebireniske toly estelikteri kelgen kópshilikti birde kúldirip, birde muńaıtyp otyrdy. Eki túrli sezimniń etegine jarmasqan tyńdarmannyń kóńil tolqynysy án estip baryp arnasyna túskendeı boldy. «Saryarqa» áni shyrqala jónelgende sary dalaǵa saıahat jasaǵandaı kúı keshtik. Artynda izdeýshisi barda Aqseleý murasy asqaqtaı beredi. Onyń eńbektep jınaǵan eńbekteri Kúlteginniń tasyndaı kún ótken saıyn taptyrmas jádigerge aınalary sózsiz. Raýan QAIDAR, «Egemen Qazaqstan».