Qazaqstan Respýblıkasy Qarjy mınıstrliginiń buıryǵy № 581 

2015 jylǵy 20 qarasha, Astana qalasy Qazaqstan Respýblıkasy Qarjy mınıstrliginiń Qarjy monıtorıngi komıteti týraly erejeni bekitý týraly» Qazaqstan Respýblıkasy Qarjy Mınıstriniń 2014 jylǵy 10 qazandaǵy № 430 buıryǵyna ózgerister engizý týraly «Qazaqstan Respýblıkasy Qarjy mınıstrliginiń keıbir máseleleri týraly» Qazaqstan Respýblıkasy Úkimetiniń 2008 jylǵy 24 sáýirdegi № 387 qaýlysyna sáıkes buıyramyn: 1. «Qazaqstan Respýblıkasy Qarjy mınıstrliginiń Qarjy monıtorıngi komıteti týraly erejeni bekitý týraly» Qazaqstan Respýblıkasy Qarjy Mınıstriniń 2014 jylǵy 10 qazandaǵy № 430 buıryǵyna (Normatıvtik quqyqtyq aktilerdi memlekettik tirkeý tiziliminde № 9846 bolyp tirkelgen 2014 jylǵy 18 qarashada «Ádilet» aqparattyq-quqyqtyq júıesinde jarııalanǵan) mynadaı ózgerister engizilsin: kórsetilgen buıryqpen bekitilgen Qazaqstan Respýblıkasy Qarjy mınıstrliginiń Qarjy monıtorıngi komıteti týraly erejede: 14-tarmaq mynadaı redaksııada jazylsyn: «14. Komıtettiń fýnksııalary: «Qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl týraly» Qazaqstan Respýblıkasynyń 2009 jylǵy 28 tamyzdaǵy Zańyna sáıkes qarjy monıtorıngine jatatyn aqshamen jáne (nemese) ózge de múlikpen jasalatyn operasııalar týraly aqparatty jınaýdy jáne óńdeýdi júzege asyrý (budan ári – Zań); 2) qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl salasynda alynǵan aqparatty taldaýdy júzege asyrý; 3) qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl salasynda memlekettik organdardyń qyzmetin úılestirý; 4) sottyń qylmystyq iske qatysty suratýy boıynsha is júrgizýindegi materıaldardy sheshý úshin qarjy monıtorıngine jatatyn aqshamen jáne (nemese) ózge de múlikpen operasııalar boıynsha qajetti aqparatty jiberý; 5) qarjy monıtorıngine jatatyn operasııalar týraly málimetter men aqparattardy quqyq qorǵaý organdary men arnaýly memlekettik organdardyń suratýlary boıynsha Qazaqstan Respýblıkasynyń zańnamasynda belgilengen tártippen berý; 6) aqshamen jáne (nemese) ózge de múlikpen jasalatyn operasııa týraly málimetter men aqparattardy, osyndaı operasııa qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa baılanysty dep paıymdaýǵa negizder bolǵan kezde Qazaqstan Respýblıkasynyń Bas prokýratýrasyna jiberý; 7) qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha halyqaralyq yntymaqtastyq baǵdarlamalaryn ázirleýge jáne júzege asyrýǵa qatysý; 8) qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl salasynda respýblıkalyq derekqor qalyptastyrýdy jáne júrgizýdi uıymdastyrý, sondaı-aq aqparattyq júıelerdiń ádisnamalyq birligin jáne kelisimdi jumys isteýin qamtamasyz etý; 9) Qazaqstan Respýblıkasynyń qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl týraly zańnamasyn buzýdyń aldyn alý jónindegi is-sharalardy ázirleý jáne ótkizý; 10) memlekettik organdardan jáne ózge de uıymdardan alynatyn aqparattyń negizinde Qazaqstan Respýblıkasynyń qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl týraly zańnamasyn qoldaný praktıkasyn qorytý, sondaı-aq ony jetildirý boıynsha usynystar ázirleý jáne engizý; 11) qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyldyń halyqaralyq tájirıbesi men praktıkasyn zerdeleý; 12) qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl salasynda kadrlardyń biliktiligin arttyrý jáne qaıta daıarlaý boıynsha is-sharalar ótkizý; 13) qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl salasynda halyqaralyq uıymdardyń, birlestikterdiń jáne jumys toptarynyń qyzmetine belgilengen tártippen qatysý; 14) Qazaqstan Respýblıkasy Ulttyq Bankimen kelisim boıynsha Zańnyń maqsaty úshin offshorlyq aımaqtardyń tizbesin aıqyndaý; 15) tıisti memlekettik organdarmen kelisim boıynsha qarjy monıtorıngi sýbektileriniń túrleri boıynsha klıentti tıisinshe tekserý úshin qajetti qujattar tizbesin aıqyndaý; 16) Komıtettiń resmı ınternet-resýrsynda ornalastyrylatyn terrorızmdi jáne ekstremızmdi qarjylandyrýmen baılanysty uıymdar men tulǵalardyń tizbesin jasaý jáne ony tıisti memlekettik organdarǵa elektrondyq túrde jiberý; 17) kúdikti operasııany toqtata turý týraly ne kúdikti operasııany toqtata turý qajettiginiń joqtyǵy týraly sheshim qabyldaý jáne ony kúdikti operasııa týraly habarlama bergen qarjy monıtorıngi sýbektisi men memlekettik organǵa elektrondyq tásilmen nemese qaǵaz jetkizgishte jetkizý; 18) olar terrorızmdi qarjylandyrýǵa baǵyttaldy dep paıymdaýǵa negizder bar operasııalardyń qatysýshylary bolyp tabylatyn tulǵalardyń banktik shottary boıynsha shyǵys operasııalaryn toqtata turý týraly sheshim qabyldaý jáne ony Zańnyń 3-baby 1-tarmaǵynyń 1) tarmaqshasynda kózdelgen qarjy monıtorıngi sýbektilerine jetkizý; 19) Qazaqstan Respýblıkasynyń Bas prokýratýrasyn, olar terrorızmdi qarjylandyrýǵa baǵyttaldy dep paıymdaýǵa negizder bar kúdikti operasııalardy toqtata turý qajettigi týraly sheshimder bergen quqyq qorǵaý organdary men arnaýly memlekettik organdardy banktik shottar boıynsha shyǵys operasııalarynyń ýaqytsha toqtatylǵany týraly habardar etý; 20) quqyq qorǵaý organdary men arnaýly memlekettik organdardyń tıisti sheshimi alynǵan kezden bastap úsh saǵat ishinde ony qarjy monıtorıngi sýbektisine jetkizý; 21) qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa baılanysty áreketterdiń aldyn alý, anyqtaý, jolyn kesý jáne tekserý, sondaı-aq Qazaqstan Respýblıkasynyń zańdaryna jáne Qazaqstan Respýblıkasynyń halyqaralyq sharttaryna sáıkes kórsetilgen kiristerdi tárkileý salasynda shet memleketterdiń quzyretti organdarymen yntymaqtastyq jasaý; 22) Komıtettiń resmı ınternet-resýrsynda ornalastyrylatyn Aqshany jylystatýǵa qarsy kúrestiń qarjylyq sharalaryn ázirleý tobynyń (FATF) usynymdaryn oryndamaıtyn jáne (nemese) jetkilikti túrde oryndamaıtyn memleketterdiń (aýmaqtardyń) tizbesin jasaý; 23) qarjy monıtorıngine, syrtqy barlaý ýákiletti organyna jatatyn operasııalar týraly málimetter men aqparatty usyný tártibin syrtqy barlaý ýákiletti organymen jáne Qazaqstan Respýblıkasynyń Bas prokýratýrasymen birlesip anyqtaý; 24) shet memlekettiń quzyretti organynyń suratýy boıynsha júzege asyrylatyn qylmystyq jolmen alynǵan kiristerdi zańdastyrý (jylystatý) jáne terrorızmdi qarjylandyrý týraly aqparattar, málimetter men qujattar berý; 25) aqparattardy, málimetter men qujattardy berýden bas tartý negizderin kórsete otyryp, shet memlekettiń suratýshy quzyretti organyn bas tartý týraly habardar etý; 26) «Ruqsattar jáne habarlamalar týraly» Qazaqstan Respýblıkasynyń Zańyna sáıkes advokattardy qospaǵanda, Zańnyń 3-baby 1-tarmaǵynyń 7), 12), 13), 14), 15), 16) tarmaqshalarynda kózdelgen qarjy monıtorıngi sýbektilerin esepke alýdy júzege asyrý; 27) «Ruqsattar jáne habarlamalar týraly» Qazaqstan Respýblıkasynyń Zańyna sáıkes advokattardy qospaǵanda, Zańnyń 3-baby 1-tarmaǵynyń 7), 12), 13), 14), 15), 16) tarmaqshalarynda kózdelgen qarjy monıtorıngi sýbektilerinen habarlamalar qabyldaýdy júzege asyrý; 28) qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjy­landyrýǵa qarsy is-qımyl salasynda táýekelderdi baǵalaýdy iske asyrý jónindegi jumysty úılestirý; 29) Kiristerdi zańdastyrý (jylystatý) jáne terrorızmdi qarjylandyrý táýekelderine baǵalaý júrgizýdiń qaǵıdalaryn, sondaı-aq kiristerdi zańdastyrý (jylystatý) jáne terrorızmdi qarjylandyrý táýekelderin tómendetýge baǵyttalǵan sharalar ázirleý jáne Qazaqstan Respýblıkasy Úkimetiniń bekitýine engizý; 30) terrorızmdi jáne ekstremızmdi qarjylandyrýmen baılanysty uıymdar men tulǵalardyń tizbesine engizilgen tulǵanyń múlki, onyń ishinde zańdy tulǵalarda oqshaýlanǵan múliktiń anyqtalǵany týraly málimetterdi mundaı múlikke tyıym salý týraly máseleni sheshý úshin Qazaqstan Respýblıkasynyń Bas prokýratýrasyna berý; 31) Zańnyń 12-baby 8-tarmaǵynyń birinshi bóliginiń 1) tarmaqshasynda kózdelgen operasııany júrgizý ne júrgizýden bas tartý týraly sheshim qabyldaý; 32) uıymdy nemese jeke tulǵany terrorızmdi jáne ekstremızmdi qarjylandyrýmen baılanysty uıymdar men tulǵalardyń tizbesinen alyp tastaý týraly ótinishti qaraý;»; 33) Qazaqstan Respýblıkasynyń zańnamasynda kózdelgen ózge de ókilettikterdi júzege asyrý.». 15-tarmaqta: 1) jáne 2) tarmaqshalar mynadaı redaksııada jazylsyn: «1) qarjy monıtorıngi sýbektilerinen, sondaı-aq Qazaqstan Respýblıkasynyń memlekettik organdarynan aqshamen jáne (nemese) ózge de múlikpen operasııalar týraly qajetti aqparatty, málimetter men qujattardy suratýǵa; 2) kúdikti operasııa belgileri anyqtalǵan jaǵdaıda úsh jumys kúnine deıingi merzimge aqshamen jáne (nemese) ózge de múlikpen operasııalardy toqtatý týraly sheshim shyǵarý;»; 5) tarmaqsha mynadaı redaksııada jazylsyn: «5) suratý boıynsha nemese derbes túrde shet memlekettiń qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl salasyndaǵy quzyretti organymen aqparat, málimetter men qujattar almasýǵa;»; 10) tarmaqsha mynadaı redaksııada jazylsyn: «10) óz qyzmeti prosesinde alynǵan qyzmettik, kommersııalyq, banktik nemese zańmen qorǵalatyn ózge de qupııany quraıtyn aqparatty, málimetter men qujattardy saqtaýdyń, qorǵaýdyń tıisti rejımin jáne saqtalýyn qamtamasyz etýge;». 2. Qazaqstan Respýblıkasy Qarjy mınıstrliginiń Qarjy monıtorıngi komıteti (B.Sh. Tájiıaqov) zańnama belgilengen tártippen: 1) osy buıryqty Qazaqstan Respýblıkasy Ádilet mınıstrliginde memlekettik tirkeýdi; 2) osy buıryqty memlekettik tirkelgennen keıin kúntizbelik on kún ishinde merzimdi baspasóz basylymdaryna jáne «Ádilet» aqparattyq-quqyqtyq júıesinede resmı jarııalaýǵa jiberýdi; 3) osy buıryqty Qazaqstan Respýblıkasy Qarjy mınıstrliginiń ınternet-resýrsyna ornalastyrýdy qamtamasyz etsin. 3. Osy buıryq 2017 jylǵy 1 qańtardan bastap qoldanysqa engiziletin 1-tarmaqtyń otyzynshy jáne otyz birinshi abzastaryn qospaǵanda, 2016 jylǵy 6 aqpannan bastap qoldanysqa engiziledi jáne resmı jarııalaýǵa jatady. Qazaqstan Respýblıkasynyń Qarjy mınıstri B. Sultanov. Buıryq Qazaqstan Respýblıkasynyń Ádilet mınıstrliginde 2015 jylǵy 20 qarashada Normatıvtik quqyqtyq kesimderdi memlekettik tirkeýdiń tizilimine № 12465 bolyp engizildi.