Ilıa Ilın tórtinshi ret álemniń úzdik aýyr atleti atandy

ASTANA. 25 aqpan. Qazaqstandyq sportshy Ilıa Ilın álem boıynsha 2015 jyldyń eń úzdik aýyr atleti atandy. Ol osymen bul ataqty tórtinshi ret ıemdenip otyr. Bul týraly Dúnıejúzilik aýyr atletıka federasııasynyń (IWF) resmı saıty – iwf.net-ke silteme jasaǵan egemen.kz tilshisi habarlady. Mundaı ataqtyń ıesi atalǵan uıymnyń saıtynda daýys berý arqyly anyqtalady. Áıelder arasynda eń úzdik atlet retinde Taıbeı sportshysy Sıýı Shý-Chınniń esimi ataldy. Qos sportshy da eki myńnan astam daýys jınap, aıqyn basymdyqpen jeńiske jetken. Sonymen qatar, IWF Ilınniń bul ataqqa kezekti ret qol jetkizýine byltyr Reseıdiń Groznyı qalasynda ótken týrnırdegi jarqyn jeńisi de sebep bolǵanyn aıtýda. Sol saıysta otandasymyz eki birdeı álem rekordyn jańartyp, búkil álemdi aýzyna qaratqan edi. Aıta keteıik, Ilın buǵan deıin 2005, 2006 jáne 2014 jyldyń úzdigi atandy. Otandasymyz úshin bıylǵy jyldyń basty jarysy Rıo-de-Janeıro Olımpıadasy ekeni belgili. Jalpy, Ilıa Ilınniń osyǵan deıin qatysqan barlyq saıysta tek altyn medal alyp kelgeni barshamyzǵa málim. Basqa jarystardy aıtpaǵanda, Olımpıadany eki ret (Beıjiń-2008, London-2012), álem chempıonatyn tórt ret (Doha, 2005, Santo-Domıngo, 2006, Parıj, 2011, Almaty, 2014) jeńip alǵan ol búginde úshinshi Olımpıada altyny úshin ter tógýde. Elaman Qońyr. Derek: iwf.net. Sýret: confederation.kz.