О́zgerister tanystyryldy

Keshe Parlament Senatynda palata Tóraǵasynyń orynbasary Asqar Beısenbaevtyń qatysýymen «2016-2018 jyldarǵa arnalǵan respýblıkalyq bıýdjet týraly» Zańǵa ózgerister men tolyqtyrýlar engizý týraly» jáne «Qazaqstan Respýblıkasynyń Ulttyq qorynan 2016 – 2018 jyldarǵa arnalǵan kepildendirilgen transfert týraly» Zańǵa ózgeris engizý týraly» zańdardyń jobalary tanystyryldy. Onda Ulttyq ekonomıka mı­nıstri E.Dosaev «Qazaqstan Respýblıkasynyń 2016-2020 jyl­darǵa arnalǵan áleýmettik-ekono­mıkalyq damý boljamy tý­raly» jáne «Qazaqstan Respýb­lıkasynyń Ulttyq qorynan 2016-2018 jyldarǵa arnalǵan kepildendirilgen transfert týraly» Zańǵa ózgeris engizý týraly» zań jobasy boıynsha baıan­dama jasady. Mınıstr bıyl­ǵy makroekonomıkalyq kórset­kishterdi Úkimet Qazaqstan ekono­mıkasynyń damýyna syrtqy jaǵymsyz faktorlardyń áserin eskere otyryp túzetkenin habar­lady. Úkimet esepteýleriniń negi­zine 2016 jylǵy AQSh dol­larynyń 300-den 360 teńgege deıingi baǵamynyń ózgerisi alyndy. Munaıdyń baǵasy barreline 30 dollar deńgeıinde boljanyp otyr, sondaı-aq, metall baǵasy 2015 jylǵy deńgeıdiń 15,0 paıyzyna deıin tómendeýi kútilýde. Ulttyq ekonomıka mı­nıs­tr­liginiń esepteýleri boıynsha, 2016 jyly Ishki jalpy ónim 0,5 paıyzdy, jan basyna shaqqanda IJО́ 6,9 myń AQSh dollaryn (2015 jylǵy qarashadaǵy kór­set­kish­terden 1,6 myń dollarǵa tómen) qurady. 2016 jyly aýyl sharýashylyǵy ónimderiniń jalpy kóleminiń ósimi, E.Dosaevtyń boljamy boıynsha, 3,5 paıyz boldy, al ónerkásip óndirisiniń kólemi 2,0 paıyzǵa tómendedi. Munaı óndirý kólemi 74,0 mıllıon tonnany qurady. «2016-2018 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasynyń mazmuny týraly Qarjy mınıstri Baqyt Sultanov habardar etti. Baıandamada aıtylǵandaı, zań jobasy Memleket basshysynyń tapsyrmasyna sáıkes daǵdarysqa qarsy sharalardy iske asyrýdy qarjymen qamtamasyz etý mindetterin sheshýge jáne negizgi kórsetkishterdiń ózgerý jaǵdaıynda bıýdjetti teńdestirýge arnalǵan. Usynylyp otyrylǵan naqtylaýlar ekonomıka men bıznestiń túıindi salalaryn, orta jáne shaǵyn bıznesti jáne agroónerkásip kesheni sýbektilerin kredıtteý, óńirlerde ınfraqurylym jáne mektepter salý, transporttyq ınfraqurylymdy damytý jáne kólemdi jobalardyń qury­lysyn qoldaýǵa baǵyttalyp otyr. «Turǵyn úı jınaqtaýshy qury­lys bankiniń» salymshylaryna ótemaqy tóleý bıýdjettiń áleý­mettik baǵyttalýyn kórsetetin shyǵystardyń biri bolyp tabylady. B.Sultanov sóziniń sońynda bıýdjettiń áleýmettik baǵdary saqtalǵanyn atap ótti. Usynylyp otyrylǵan shyǵystar kredıtteýdi ulǵaıtýǵa, iri jobalardy aıaq­taýǵa, óńirlerdiń qarjysyn turaq­tandyrýǵa, halyqtyń jumys­pen qamtylýyn qoldaýǵa, tur­ǵyn úılerdi salýǵa jáne jalpy is­ker­lik belsendilikti arttyrýǵa jaǵ­daı týǵyzady. Otyrysta Ulttyq bank tóra­ǵasynyń orynbasary mindetin atqarýshy Oleg Smolıakov «Aq­sha-kredıt saıasaty týraly» baıan­dama jasady. Aǵymdaǵy jaǵ­daılarda Ulttyq banktiń aq­sha-kredıt saıasatyn jáne Úki­mettiń fıskaldyq saıasatyn úı­les­tirý makroekonomıkalyq turaq­tylyqty qamtamasyz etý­degi negizgi faktorlardyń biri bolyp tabylatynyn atap ótti. 2016 jylǵy qańtardyń qory­tyndysy boıynsha ınflıasııa jyl­dyq kórsetkish boıynsha 14,4 paıyzdy qurady. Ulttyq bank­tiń 2016 jylǵa arnalǵan negiz­gi mindeti ınflıasııa deńgeıin turaqtandyrý jáne belgilengen 6-8 paıyz dálizge jedel oralý bolyp tabylady. Inflıasııany 2020 jylǵa qaraı 4 paıyzǵa deıin tómendetý orta merzimdi baǵdar bolyp qalady. Baıandamada atap ótilgendeı, Ulttyq bank erkin ózgermeli aıyrbastaý baǵamy saıasatyn ustanatyn bolady. Bul bir jaǵynan, altyn-valıýta aktıvterin saqtap qalady, al ekinshi jaǵynan, otandyq óndirýshilerdiń básekege qabilettiligin qoldap otyrady. O.Smolıakov úkimet engizgen ózgeristerge qoldaý bildirdi, óıt­keni makroekonomıkalyq turaq­tylyq pen teńestirilgen jáne ornyqty bıýdjetti qamtamasyz etpeıinshe Ulttyq banki aldynda turǵan mindetterdi tabysty sheshý múmkin emes. Depýtattar zań jobala­ry bo­ıynsha jumystardy komı­tet­terdiń otyrystarynda jáne jumys toptarynda odan ári jal­ǵas­tyrady, dep habarlady Senat­tyń baspasóz qyzmeti.