110 jasqa tolǵan qarııa

el ıgiligine tileýqor bolyp otyr Ońtústik Qazaqstan oblysy, Sozaq aýdany, Jartytóbe aýyly, Aqqoltyq eldi mekeninde 110 jasqa tolǵan Beısen Rysymbetov degen aqsaqal turady. Bir ǵasyrdan astam ómir súrse de, aıtar sózinen jańylmaǵan qarııanyń týǵan kúnine oraı aýdan ákimi Maqsat Isaev arnaıy izdep kelip, ıyǵyna shapan japty. Ákimniń nıetine razy bolǵan ol: «Kózim nasharlap, qulaǵym aýyrlasa da, eldiń, Elbasynyń amandyǵyn tilep, memleketimizdiń jaqsy tileýqory bolyp otyrmyn. Sen qarııany syılasań, el seni syılasyn. О́rke­niń óssin», – dep bata berdi. «Qarııasy bardyń qazynasy bar» degen. Urpaqtaryńyzdyń berekesi bolyp, kóz aldynda aman-esen júre berińiz. Elimizde ózi­ńizdeı súıegi asyl, qazynaly qa­rııa­larymyz kóp bolsyn, jasy­ńyzdy urpaqtaryńyzǵa ber­sin», – dedi aýdan ákimi. Búginde 110 jasqa kelgen aqsa­qaldyń jubaıy Jaqsyqyz Begmanova 75 jasta. Ekeýi eki ul, bes qyz súıip, olardan 32 nemere, 22 shópshek súıip otyr. Jas al­shaqtyǵyna kelsek, Beısen aqsaqaldyń alǵashqy jubaıy Tal­shybyq Tanabaıqyzy qursaq kótermegennen keıin ózi ruqsatyn berip sol kezdegi 16 jastaǵy órim­deı qyz Jaqsyqyzdy alyp bergen eken. – Bısekeńniń jas kezinde seri, aıtysqa túser aqyndyǵy da bol­ǵan, – deıdi Jaqsyqyz apaı. – Báıbishesi Talshybyqpen tatý-tátti bir shańyraqtyń astynda jıyrma jylǵa jýyq birge turdyq. Ol kisi 1975 jyly dúnıeden ótti. Otaǵasy 1960 jyldan bastap attan túspeı, túıe baqty. Tek 1990 jyldary taıaǵyn inisi Álenge ótkizdi. Áýeli Alla, sosyn osy shalymnyn arqasynda bala-shaǵalarymyzben aqar-shaqar bolyp baqytty ómir súrip jatyrmyz, – deıdi. Júz on jasqa kelse de, nemere, shóbereleriniń atynan ja­ńylyspaıtyn qarııanyń den­saýlyǵy myqty bolýynyń syryn nemere inisi, aýyldyq aýrý­hananyń bas dárigeri Madııar Beı­senbekov qymyran, shubattyń shıpasynan dep túsindiredi. Seksen tórt jasqa deıin at ústinen túspeı, keńshardyń túıesin baqqan aqsaqaldyń eń jaqsy kóretin qoregi shubat bolypty. Týǵan kúnine arnaıy kelgen aýdan ákimi bastaǵan azamattarǵa qarııa batasyn berdi. Baqtııar TAIJAN, «Egemen Qazaqstan». Ońtústik Qazaqstan oblysy.