Italııada Ýmberto Ekonyń kitaby jaryq kórdi

ASTANA. 28 aqpan. Italıan jazýshysy Ýmberto Ekonyń ózi dúnıeden ótkennen keıin «Pape Satan Aleppe» atty kitaby jaryq kórdi. Bul týraly RIA «Novostı» aqparat agenttigine silteme jasaǵan egemen.kz tilshisi habarlady. Kitap «Teseıdiń kemesi» degen baspadan shyqty. Jazýshy ári fılosof Ýmberto Eko bul mekemeniń qurylýyna úlken úlesin qosqan. Alǵashynda kitaptyń shyǵý merzimi naýryz aıyna josparlanǵanymen, Ýmberto Ekonyń qazasynan keıin osy aıdyń sońyna josparlandy. Ýmberto Eko osy jyldyń 19 aqpan kúni Mılan qalasynda 85 jasyna qaraǵan shaǵynda qaıtys boldy. Dárigerler shamamen eki jyl buryn uıqy beziniń isigine shaldyqqany týraly dıagnoz qoıǵan. Alaıda, osyǵan qaramastan ómiriniń sońyna deıin tynbaı qyzmet etip keldi. Ýmberto Ekonyń áıgili aqyn Danteniń shyǵarmasymen attas kitabyna esseleri men ózekti qoǵamdyq taqyryptar boıynsha jasalǵan baıandamalary toptastyrylǵan. Atalǵan baspanyń bas dırektory Elızabetta Zgarbıdiń aıtýynsha, jazýshy bul kitabyn tolyǵymen óńdep, baspaǵa berip úlgergen. Jazýshynyń kitaby oqyrmandar arasynda úlken suranysqa ıe boldy. «Teseıdiń kemesi» 75 myń danasyn shyǵardy. Aıan Ábdýálı. Derek, sýret: RIA «Novostı».