«Dara kúnderimniń, nala túnderimniń, serigi bolǵanyń úshin, senimi bolǵanyń úshin, men seni aıalaımyn» dep qazaq poezııasyna adaldyǵynan tanbaǵan aqyn Farıza Ońǵarsynovanyń eskertkishi somdaý konkýrs arqyly tańdaldy. Qazaqstan jobalaýshylar ulttyq qaýymdastyǵynyń vıse-prezıdenti, Qazaqstan Respýblıkasynyń eńbek sińirgen sáýletshisi Serik Rústambekovtiń aıtýynsha, konkýrsqa aqynnyń beınesi somdalǵan 12 joba usynylǵan. Onyń ishinde aqynnyń otyrǵan beınesi somdalǵan nusqa da bolypty.
Arnaıy komıssııanyń músheleri búgin tuǵyrǵa ornatylǵan nusqasyna tańdaý jasapty. Eskertkish qoladan quıylǵan, tuǵyrynyń bıiktigi – 4 metr 50 sm, al aqyn beınesiniń bıiktigi 4 metr 10 sm. Tuǵyrdyń segiz qabyrǵasy bar, onyń birinde aqynnyń aty-jóni, qalǵan jeteýinde poezııa padıshasynyń óleńderinen bir shýmaqtan jazylǵan. «Aqynnyń týystarymen de aqyldastyq. Olar bizdiń sheberhanamyzda bolyp, shash úlgisine qatysty óz oılarymen bólisti. Músindi Murat Mansurov jasady.
Aqynnyń shabyttanyp, jańa jyr jazýǵa umtylyp turǵanyn beıneledik» – deıdi sáýletshi Serik Rústambekov. Aqyn eskertkishi Atyraý qalasyndaǵy qazaq ǵylymynyń zańǵar tulǵasy Qanysh Sátbaev dańǵylynda boı kóterdi. Onyń ashylýyna Atyraý oblysynyń ákimi Baqtyqoja Izmuhambetov, óńirdiń zııaly qaýym ókilderi, aqynnyń týystary men jastar býyny qatysty.
«Farıza Ońǵarsynova tek poezııanyń dúldúl tulǵasy ǵana emes, sonymen birge, elimizdiń táýelsizdigin nyǵaıtýǵa óz úlesin qosqan memleket jáne qoǵam qaıratkerligimen tanyldy», – dedi aqyn eskertkishiniń ashylý saltanatynda oblys ákimi Baqtyqoja Izmuhambetov.
Búgingi qazaq prozasynyń tanymal ókili, jazýshy-dramatýrg Rahymjan Otarbaev «Kóp eldi aralaı júremiz. Sol kezde qandaı tulǵalary bar, qandaı mádenıeti, qandaı eskertkishteri bar?» degendi oı eleginen ótkizemiz. Elimizdiń mádenıetine qosylar tańdaýly eskertkishter – Jumeken Nájimedenov pen Farıza Ońǵarsynovanyń beıneleri Atyraýda boı kóterdi. Farıza Ońǵarsynova minezdi aqyn edi.
Onyń minezi poezııasynda da anyq baıqalyp turatyn», – dedi. Farıza Ońǵarsynovanyń eskertkishiniń aq jamylǵysyn oblys ákimi Baqtyqoja Izmuhambetov pen eńbek ardageri Mellıat Sabyrova ashty. Aqynnyń týystary atynan Aıbek pen Almagúl Ońǵarsynovalar óz oılarymen bólisip, eskertkishtiń kóńilden shyqqanyna toqtaldy. Aqyn jyrlary oqylyp, sózine jazylǵan ánderi shyrqalyp turdy.
Joldasbek Shópeǵul.
Derek: egemen.kz. Sýretter: Rahym Qoılybaev.
