О́zi týraly derekterdi teksere alady

4 naýryzdan bastap saılaýshylar tizimderi tanysý úshin ýchaskelik saılaý komıssııalarynyń úı-jaılarynda usynylady. Ortalyq saılaý komıssııasynyń keshe ótken otyrysynda OSK múshesi Lázzat Súleımen osy máselege toqtaldy. Onyń aıtýynsha, naýryzdan bastap saılaýshylar tizimderi tanysý úshin ýchaskelik saılaý komıssııalarynyń úı-jaılarynda usynylady, odan árbir saılaýshy daýys berý kúnine deıin jáne saılaý kúni ózi týraly derekterdi teksere alady. Ol úshin ýchaskelik saılaý komıssııasyna jeke basyn kýálandyratyn, sondaı-aq, turǵylyqty jeri boıynsha tirkelgenin rastaıtyn (mekenjaı anyqtamasy) qujattarmen kelip, saılaýshylar tizimimen muqııat tanysýy qajet. «Saılaýshynyń tegi tizimde bolmaǵan nemese ol ózi týraly derekterde dálsizdikterdi anyqtaǵan jaǵdaıda, saılaýshy atalǵan qujattardyń negizinde tizimge engizýdi nemese qajetti túzetýlerdi engizýdi talap ete alady, – dedi L.Súleımen. – Saılaýshylar tizimderine engizý, olardan shyǵarý ne saılaýshylar tizimderinde túzetýler jasaý qajettigi týraly aryzdardy ýchaskelik saılaý komıssııasy saılaý komıssııasyna aryz kelip túsken kúni qaraıdy. Aryz maquldanbaǵan jaǵdaıda saılaý komıssııasy aryzdanýshyǵa onyń aryzynyń maquldanbaǵany týraly dáleldi sheshimniń kóshirmesin keshiktirmeı beredi. Bul sheshimge saılaýshy sotta shaǵymdana alady». Sonymen qatar, OSK múshesi esepten shyǵarý kýáligine qatysty máselege de toqtaldy. L.Súleımenniń atap ótýinshe, Qazaqstan Respýb­lıkasynyń aýmaǵynda ózi turatyn eldi mekennen tysqary shyqqan jaǵdaıda, daýys berý quqyǵyn beretin esepten shyǵarý kýáligi saı­laýshyǵa daýys berý múmkindigin beredi. Ol saılaýshyǵa ne onyń ókiline senimhat boıynsha jazbasha ótinish negizinde 4 naýryzdan bas­tap 19 naýryz kúngi saǵat 18.00-ge deıingi kezeńde beriledi. Esepten shyǵarý kýáligin ýchaskelik saılaý komıssııasynyń tóraǵasy nemese múshesi saılaýshynyń tilegi boıynsha memlekettik tilde nemese orys tilinde toltyrady. «Bul rette ýchaskelik saılaý ko­­mıs­­sııasynyń esepten shyǵarý kýáligin bergen múshesi saılaýshylar tizimindegi óziniń teginiń tusynda «eskertý» degen baǵanda esepten shyǵarý kýáliginiń berilgeni jóninde, onyń bes tańbaly serııaly nómirin, berilgen kúnin jazbasha engizip, óziniń qolyn qoıýy tıis, – dep jalǵastyrdy sózin OSK múshesi. – Saılaýshynyń esepten shyǵarý kýáligin alýǵa óti­ni­shi saılaýshylar tizimine qosa tirkeledi jáne saılaýshyny atalǵan saılaý ýchaskesi boıynsha tizimnen shyǵarý úshin negiz bolyp tabylady. Esepten shyǵarý kýáligi basqa saılaý okrýginde nemese bir eldi meken sheginde basqa saılaý ýchaskesinde daýys berýge qatysqysy kelgen adamdarǵa berilmeıdi. Joǵalǵan esepten shyǵarý kýálikteri qaıta qalpyna keltirilmeıdi jáne kóshirme nusqalary berilmeıdi». Budan soń L.Súleımen daýys berý kúni esepten shyǵarý kýáligin usynǵanda ýchaskelik saılaý komıssııasy ony kelgen orny boıynsha saılaý ýchaskesindegi saılaý­shylar tizimine engizetininen habardar etti. «Oblystyq, qalalyq, aýdandyq máslıhattarynyń depýtattaryn saılaýda esepten shyǵarý kýáligin basqa saılaý okrýginiń ýchaskelik saılaý komıssııasy bergen jaǵdaıda, saılaýshy saılaýshylar tizimine engizilmeıdi, – dedi ol osy týraly. – Sondaı-aq, esepten shyǵarý kýáligin bir eldi meken shegindegi basqa saılaý ýchaskesi bergen jaǵ­daıda, saılaýshy saılaýshylar tizimine engizilmeıdi. Al aýdandyq, qalalyq, qaladaǵy aýdandyq saılaý komıssııalary esepten shyǵarý kýálikteriniń paıdalanylǵany týraly esepterdi tıisti oblystyq, Astana jáne Almaty qalalarynyń saılaý komıssııalaryna paıdalanylmaǵan esepten shyǵarý kýálikterin joıý týraly aktilerimen qosa berýi tıis». Álısultan QULANBAI, «Egemen Qazaqstan».