Erlik dańqy óshpeıdi

Uly Otan soǵysyn jyldar alystatqanmen, onda jasalǵan erlikter umytylmaq emes. Atalary men ájeleri soǵys qyrǵynyn kórgen nemese maıdan dalasynda qalǵan búgingi urpaq olardyń erligin maqtan etetini qýantady. Belgili jýrnalıst, jazýshy Sálim Meńdibaev qyzmet isteıtin «Qostanaı tańy» gazetine Jeńistiń 70 jyldyǵyn merekelegen ótken jyly oblys óńirinen eki júzden asa hat tústi. Olardyń barlyǵynda soǵys ardagerleriniń nemereleri, shóbereleri, tipti, shópshekteri atasy men ájesiniń Uly Otan soǵysy jyldaryndaǵy erligin, tylda istegen eńbegin maqtan etetinin jazǵan jáne ony táp-táýir baıandaıdy. Avtor óz qolynan ótken júrek tebirenter, patrıotızmge toly hattardyń gazet tikpesimen birge shań basqan arhıvterge jibermeı, oqyrmanǵa qaıta usynýdy jón kóripti. – Atalardyń Otan úshin tógilgen qanyn baǵalaý, olardy umytpaý, maqtan etý búgingi urpaqtyń jaqsy tárbıesi der edim, táýelsiz elimizdiń shuǵylaly erteńine degen senim uıalatady. Men osy hattardy, olarmen birge jibergen maıdandaǵy kóne sýretterdi kitapqa engizdim. Bular keler urpaq úshin de   qajet dúnıe, – deıdi kitap avtory Sálim aǵa. Al kitaptyń alǵashqy taraýlarynda maıdangerler týraly jazǵan avtordyń óz shyǵarmalary toptas­tyrylypty. Ásirese, ekinshi taraýynda bes jylǵa taıaý sozylǵan alapat soǵystyń Lenıngrad qorshaýy, Bresti alý, Stalıngrad maıdany, Belorýssııany azat etý, Berlınge shabýyl sekildi negizgi kezeńderine sholý jasalady da, sol surapyl kúnderdiń kýágerindeı, qan keshken qostanaılyq jaýynger-ardagerler týraly baıandaıdy. Munyń da oqyrmanǵa tanymdyq mańyzy zor. Tusaýkeserde jazýshy, osy keshti júrgizgen Ǵumar Ahmetchın, oblystyq ardagerler keńesiniń tóraǵasy Kenjebek Ýkın, kitap­tyń shyǵýyna demeýshilik kór­setken О́mirzaq Ihtılıapov, taǵy basqalar kitaptyń jas urpaqtyń patrıottyq tárbıesine bereri kóp ekenin tilge tıek etti. Názıra JÁRIMBETOVA, «Egemen Qazaqstan». QOSTANAI.