Qus bop ushý qoldan kelmeıtin tirlik ekenin ańǵarǵanyńda ushqysh bolýdy armandaısyń. Adamnyń aspanǵa osynshama qushtar, ińkár bolatyn sebebi nede eken? Áıteýir jas kúninde aspanǵa áýes bolmaıtyn bala joq. Eseıe kele, esiń kire munyń bári jónine qalyp, tirshiliktiń qamytyn moıynǵa myqtap salyp, taǵdyr aıdaǵan soqpaqpen jelip kete beretiniń taǵy bar.
Degenmen o bastaǵy armanyn adaspaı tapqan adamdar da jetkilikti aramyzda. Bala kúninen ǵaryshqa sapar shegýdi aldyna murat etip qoıǵan Aıdyn Aıymbetovtiń ózi sózimizdiń dáleli. Jigitten ushqysh ne ǵaryshker shyǵar-aý. Al táı-táı basqan shaǵynan taýdaı armanǵa qulash sermegen qyzdar qaýymy qaıtpek? Árıne, áıel zatynyń arasynan ǵaryshty baǵyndyrǵandar az emes. Qazirdiń ózinde qazaqtyń qarakóz Toty Ámirova ushaqty urshyqsha ıirip júr. Biraq bul barsha qyzdyń qolynan kele bermesi anyq. Áıtkenmen qyzdardyń da bala qııalynyń oryndalýy múmkin. Ol – stıýardessa bolý.
Stıýardessa degenińizdiń ózi ekiniń birine, egizdiń syńaryna buıyrmaıtyn mamandyq dep bilgen ek. Áli kúnge deıin sondaı oıda bolar ma edik, kim bilsin? Deıturǵanmen, Qyzylorda oblysy, Shıeli aýdany, Eńbekshi aýylynda dúnıege kelgen Aqbilek Júsipova osy mamandyqty ıgergende oıymyzdyń qate ekenin túsingendeımiz. Aqbilek – Táýelsizdiktiń tól qurdasy. Bul urpaq azattyqtyń aq tańymen qatar ómirge kelip, egemen elde tárbıelenýiniń ózi úlken tarıhı oqıǵa dep uǵamyz. Stıýardessa qyz aýyl mektebinde bilim aldy. Sonan soń armanyn úkilep Almaty bardy. Onda Shet tilder jáne iskerlik karera ýnıversıtetine tústi. Oqýyn óte jaqsy oqyp, týrızm mamandyǵy boıynsha qyzyl dıplom ıegeri atandy. Bilimdi jasqa árqashan jol ashyq bolsa kerek. Oqýyn aıaqtaǵan soń birneshe mekemeden usynys túsken. Biraq ol jumystardyń eshqaısysy Aqbilektiń kóńilindegideı bolmady. Zaman damyp, jańa tehnologııalar ómirimizge dendep engen kezeń ǵoı. Internetten ózi armandaǵan isti izdep júretin. Kúnderdiń bir kúninde «Air Astana» kompanııasy stıýardessa jınap jatqany týraly aqparatqa jolyqty. «Izdegenge – suraǵan» degen osy emes pe?!
Stıýardessa bolý ońaı emes eken. Ol úshin birneshe satydan turatyn synaqtan ótýge tıis boldy. Eń aldymen til bilýi qajet. Qazaqsha men orysshany bylaı qoıǵanda, aǵylshyn men túrik tilin erkin biletin boıjetkenge bul synaq qıyn bolǵan joq. Densaýlyq jaǵdaıy túpkilikti tekserildi. Kinárat tabylmady. Onan soń túri men symbaty, boıy men oıy sáıkes kelýi kerek eken. Bul jerde de asa qıyndyq týyndamady. Al odan keıingi bort serikke baýlıtyn mektepti úzdikterdiń qatarynda bitirdi. Ushaqtaǵy árbir sát pen yqtımal qıyndyqtardyń bárin meńgerdi. Solaısha, Qazaqstandaǵy synaqtardan súrinbeı ótti. Endi mamandyqty tolyqqandy ıgerý úshin shetelge baryp tájirıbeden ótýi kerek. Ol úshin Germanııaǵa jiberildi. On kún boıyna Qazaqstanda ıgergen bilimi synaldy. Aqyrynda, barlyǵynan kedergisiz ótip, stıýradessa mamandyǵyn alyp shyqty.
Mine, sodan beri «Air Astana» kompanııasynda qyzmet etip keledi. Alǵashynda jalpy salonda, áýe kompanııasynyń tilinde aıtqanda «ekonomklassta» jumys istedi. Árbir jolaýshynyń yńǵaıyna qarap, jaǵdaıyn jasady. Kópshilikke qyzmet etý ońaı emes. Adam degenińiz ártúrli bolady. Olardyń barlyǵyna shydap, qabaq shytpaı qyzmet etý de jeńil jumystyń qatarynan emes. Degenmen, jumysynyń qyzyǵy kún sanap ózine baýrap, tájirıbesi jetile berdi. Arada birneshe jyl ótkende Aqbilek Júsipovany bıznes klass jolaýshylaryna qyzmet kórsetetin jumysqa aýystyrdy. Bul onyń biliktiligin dáleldese kerek.
Aqbilek búginde álemniń túkpir-túkpirin erkin sharlap júr. Ystambulǵa eki kúnniń birinde barady desek, artyq aıtqandyq emes shyǵar. TMD memleketteriniń bárinde boldy. Eýropa elderin tolyq kórdi, tanydy. Alystaǵy aýyldan shyǵyp, armanyna adaspaı jetken boıjetkenniń bolashaǵyna biz de sáttilik tileımiz.
Eljas ÁBDILDA, jýrnalıst. Qyzylorda oblysy.
