Elbasy Oraldaǵy Qadyr Myrza Áli atyndaǵy ortalyqta boldy

ORAL. 9 naýryz. Elbasy Oral qalasyndaǵy Qadyr Myrza Áli atyndaǵy mádenıet jáne óner ortalyǵynda boldy. Bul týraly akorda.kz habarlady. Memleket basshysy óner men mádenıet zalyn, kitaphanany jáne memorıaldyq kabınetti qarap kórdi. Sondaı-aq, Nursultan Nazarbaev oblystyń shyǵarmashyl zııaly qaýym ókilderimen kezdesti. Qazaqstan Prezıdenti álemdik ekonomıkanyń jańarýyna ǵylymı jetistikter men ınnovasııalar negiz bolatynyn atap ótti. «Bizder jáne jas urpaq múlde basqa qurylymdaǵy ekonomıkanyń kýágeri bolatyn bolamyz. Buǵan eń aldymen bilim arqyly daıyndalýymyz kerek. Balalardyń boıyna mektep oryndyǵynan bastap ınnovasııalyq turǵydan oılaý qasıetin darytý kerek. Bolashaqta búgingi mamandyqtarǵa qajettilik azaıady. О́ıtkeni, qazirgi zamanda ǵylym óte jyldam damyp jatyr. Qazir basqa sıpattaǵy bilim qajet. Balalardyń erkindigi men shyǵarmashylyǵyna kóbirek múmkindik berip, belsendi oılaý qabiletine qoldaý kórsetý kerek», – dedi Memleket basshysy. Shyǵarmashyl zııaly qaýym ókilderi Nursultan Nazarbaevqa júrgizip otyrǵan tatýlyq pen kelisim saıasaty úshin, eldiń túrli etnostarynyń mádenıeti men dástúrlerin saqtaýǵa qajetti jaǵdaı jasalǵany úshin alǵys aıtty. Shyǵarmashylyq úıi ádebı-shyǵarmashylyq sıpattaǵy kezdesýler men konsertterdi, beıneleý óneri týyndylarynyń kórmesin, oblystyń jazýshylary men aqyndary shyǵarmalarynyń kitaphanasyn uıymdastyrý sııaqty túrli sharalar ótkizýge arnalǵan. Temir Qusaıyn. Derek, sýret: akorda.kz.