Analarǵa arnalǵan tósbelgi

Bıyl Barqytbel baýyrynda ana­larǵa aıryqsha qurmet kórsetilip, «Tarbaǵataıdyń altyn anasy» tósbelgisi tap­syryldy. Shy­ǵystyń sheka­ralyq shalǵaı óńirinde elge eńbegi sińgen, tárbıeli ul men ónegeli qyz ósirgen analar qaýymyna arnalǵan aıryqsha tósbelgini aýdan ákimi Dildábek Orazbaev tabys etti. Batyr analardyń balalary «Týǵan jerge – taǵzym!» aksııasy boıynsha ózderi ósken óńirdiń órkendeýine úles qosyp keledi. Erekshe marapatty osy óńirdiń ystyǵyna kúıip, sýyǵyna tońyp, shyńdalyp ósken azamattardy tárbıelegen analarǵa degen qurmet retinde qabyldasa bolady. Ananyń aıaly alaqanymen alǵadaı azamatqa aınalǵan olar týǵan jerlerin umytpaı, biri aýyl kóshelerin asfalttasa, taǵy biri jaryqtandyrý jumystaryn júrgizip, basqa da áleýmettik máselelerdiń sheshimin tabýǵa kómek qoldaryn sozyp júr. Osynyń arqasynda aýdandyq bıýdjetten 22 mıllıon teńge únemdeldi. – Alyp ta, aqyn da, ǵalym da anadan týady. Biz aýdanymyzdaǵy analar men ájelerimizge qurmet kórsetý maqsatynda atalǵan tósbel­gini usynyp otyrmyz, – dedi aýdan ákimi Dildábek Orazbaev. Jántikeı aýylynyń turǵyny Tynyshtyq Aıtjanova 33 jyl boıy fızıka páninen sabaq berdi. Qazir 8 bala ósirip, 14 nemere súıip otyr. – Balalardyń bos ýaqytyn tıimdi paıdalanýǵa, kóńili súıgen isimen aınalysýyna múmkindik berdik, – deıdi «Altyn alqa» ıegeri. Bul áýlettiń balalary 1,5 mıllıon teńgege mekteptiń bir synybyn jóndeýden ótkizip, jańa qural-jabdyqtar alyp bergen eken. Dýman ANASh, «Egemen Qazaqstan». Shyǵys Qazaqstan oblysy, Tarbaǵataı aýdany.