Júzinen shýaq tógilgen

Keıde keskin-kelbeti men júris-turysy, minezi men adamı qasıetiniń janyńa jaqyn bolǵany sondaı, ózińe kópten etene tanystaı kórinip júretin adamdar bolady. Ádette, mundaı kisiler qanshalyqty joǵary laýazymdy qyzmet atqarǵanymen, qarapaıym da jaıdary júzinen tanbaı, jan-jaǵyna jyly shýaǵyn shashyp, tóńiregin shapaǵatyna kómildirip júredi. Men biletin sondaı tolymdy tulǵanyń biri – T.Júrgenov atyndaǵy Qazaq ulttyq óner akademııasynyń oqý jáne oqý-ádistemelik jumys jónindegi prorektory, Qazaqstan Respýblıkasy bilim berý isiniń qurmetti qyzmetkeri, pedagogıka ǵylymdarynyń doktory, professor Gaýhar Aldambergenova. Ol Syrdyń boıyndaǵy Ja­laǵash degen aýdan ortalyǵynda bir qaýym elge syıly bolǵan Tóremurat degen qarııanyń otbasynda boıjetipti. Osy sha­ńyraqta Aqbópe atty aıaýly anadan ómirlik ónege alypty. Ata men ananyń bergen tálimdi tárbıesiniń arqasy shyǵar, bir úıdegi úıelmendi-súıelmendi 4 ul men 4 qyzdyń bári joǵary bilim alyp, ómirden óz oryndaryn taýypty. Jáne bir tańǵalarlyǵy, aǵaıyndylardyń kópshiligi bilim-ǵylym salasyna bet buryp, salada aıtarlyqtaı jetistikterge jetip júr eken. Meniń bulardyń eń kenjesi – bizdiń keıipkerimiz Gaýhar Tóre­muratqyzyn jaqynnan tanı bas­­taǵanyma 5-6 jyldaı ýaqyt bolypty. Ras, bir qaraǵanda, qa­tal­daý bolyp kórinetini de bar eken. Biraq munysy ózine qa­pysyz jarasatyn. Sebebi, bilim-biliginiń joǵarylyǵy kóp uzamaı ańǵarylyp qalatyn, parasat-paıymy bıik ekeni de bilinip tura­tyn. Osyǵan qarap-aq biz sóz etip otyr­ǵan qaıratkerdiń ádildiktiń adamy ekenin uǵynýǵa bolar edi. Al osy oqý ornyna kelip, qyz­met ete bastaǵan jyldarymnan beri oqý jáne oqý-ádistemelik ju­mys jónindegi prorektordyń óziniń laıyqty ornyndaǵy tulǵa, uı­ym­­dastyrýshylyq qabiletiniń óte joǵary, ujymnyń janashyr bas­­shy­larynyń biri ekenin bile tústim. – Men Gaýhardy adam retinde de, ustaz retinde óte joǵary ba­ǵalaımyn. Ol oqý ornyndaǵy oqý úderisin uıymdastyryp otyrýda orasan zor jumystar atqarady. Kisimen til tabysa alatyn da qa­sıeti bar. Ol aldyna kelgen bar­lyq adamnyń máselesin sheship bere almaýy múmkin, biraq kimdi de bolsa jyly sózimen qarsy alyp, shyǵaryp salyp turatyn qasıeti ony qashanda jaqsy adam, jaqsy basshylar qatarynan kórsetip keledi, – deıdi ol týraly akademııa professory, belgili jazýshy-dramatýrg Dýlat Isabekov. – Gaýhardy burynnan tanımyn. Sonda baıqaǵanym, ol qashannan stýdentterdiń úl­ken jetekshisi sııaqty. Únemi solar­dyń jaǵdaıyn jasap júre­di. О́z aı­nalasyndaǵylarǵa eshqan­daı qysym jasamaıdy, bárin aqyl-parasatpen sheshedi. Uıym­dastyrýshylyq qabileti óte zor. Bilimdi. Ol sonymen birge, ba­ryn­sha taza, adal adam bolýymen de kóptiń qurmetine bólenip júr, – deıdi akademııanyń kelesi bir professory, belgili rejısser Esmu­han Obaev. Eńbegin sátti qorǵaǵannan keıin 2000 jyldyń qarashasynda oǵan pedagogıka ǵylymdarynyń kan­dıdaty ǵylymı dárejesi be­rildi. 2008 jyly Abaı atyn­daǵy QazUPÝ-ǵa «Jalpy pedago­gıka» mamandyǵy boıynsha dok­torantýraǵa tústi. 2010 jyly arnaıy dıssertasııalyq keńeste «Qazaq halyq pedagogıkasynda qyzdarǵa moraldyq-etıkalyq tárbıe berý» taqyryby boıynsha doktorlyq dıssertasııa qorǵady. 2011 jyldyń jeltoqsan aıynda ǵalymǵa pedagogıka mamandyǵy boıynsha professor ataǵy berildi. Gaýhar Aldambergenova bú­ginde 80-nen astam ǵylymı eń­bektiń avtory. Olardyń arasynda nóldik emes ımpakt-faktory bar, sheteldik baspalarda jaryq kórgen jarııalanymdar da jeterlik. Biz biletin Gaýhar Aldambergenova ózin aldyna árdaıym bıik maq­sattar qoıyp, soǵan jetý jolynda izdený men eńbektenýden talmaıtyn bıik murattardyń adamy retinde kórsetip keledi. Onyń mundaı ónege tutarlyq qasterli qasıet­terinen ózi qyzmet etip kele jatqan ujym utpasa, áste utylǵan emes. Jańagúl SULTANOVA.