Jol taram bolsa da maqsat ortaq

Elimizdegi Parlament Májilisi jáne barlyq deń­geıdegi máslıhattar saılaýlary naýqanyna Jalpy­ulttyq sosıal-demokratııalyq partııanyń da qa­tysyp jatqany belgili. Olardyń Májilis depý­tat­tyǵyna 23 úmitker usynǵany da barshaǵa málim. Olar jer-jerde úgit-nasıhat jumystaryn júrgizip keledi. Partııanyń Májilis depýtattyǵyna kandıdat etip usynǵan tórt belsendisi – ekonomıka ǵylymdarynyń doktory Jangeldi Shymshyqov, «Kenesary han» qoǵamdyq qorynyń jetekshisi, partııa múshesi Ýálıhan Qaısarov, bloger Aslan Qurmanbaev jáne partııanyń Qostanaı oblystyq fılıalynyń tóraǵasy Sergeı Bogatyrev Qostanaı oblysy jurtshylyǵymen kezdesti. Kezdesý aldynda Qostanaı oblystyq fılıaly saılaýshylarǵa partııanyń «Sosıal-demokrat» gazeti men saılaýǵa shaqyrǵan únparaqtar taratty. Partııa belsendisi, Májilis depýtattyǵynan úmit­ker Jangeldi Shymshyqov aldy­men sóz aldy. Ol elimizdegi saılaý naý­qanyna qatysyp jatqan saıası partııa­lardyń qaı-qaısysy da qoǵamnyń damýyn, memlekettiń ósip-órkendegenin kózdeıtinin jáne «bılikke batyryp aı­tamyz» degenmen de bıliktiń de, Jal­pyulttyq sosıal-demokratııalyq partııanyń da ılegeni bir teriniń pushpaǵy ekenin atap ótti. Ol Qazaqstan jáne dúnıejúzi eko­no­mıkasyndaǵy qalyptasyp otyrǵan jaǵdaıǵa sholý jasady. Sheshen ekono­mı­kadaǵy shıkizat óndirýdiń úlesin azaıtyp, óńdeý salasyn damy­týǵa kóp mán berý kerektigin aıtty. О́ń­deý kásiporyndaryn damytýdyń arqa­synda úlken tabysqa jetýge bolatynyn kóldeneń tartty. Biraq muny aıtýǵa ońaı bolǵanymen, júzege asyrý úshin kóp kúsh-jiger jumsaý kerek bola­tynyn da jasyrmady. Sonymen qatar, Jangeldi Erdenuly ár memleket úshin ekonomıkanyń basymdyq bere­tin salasy, tipti, óndiretin ónim túri bo­lýy kerektigin aıtty. Qazaqstan úshin basymdyq beriletin sala aýyl sharýa­shylyǵy, ıaǵnı mal, egin ekenin bildirdi. – Ulan-ǵaıyr jer mal sharýashylyǵyn da,   egin sharýashylyǵyn da damytýǵa mol múm­kindik beredi. Aýyl sharýashylyǵy ónim­derin syrtqa shıkizat kúıinde sat­paı, óńdeý isin damyta berýimiz kerek, – dedi J.Shymshyqov. Munan keıin sóz alǵan bloger A.Qurmanbaev elimizdegi quqyq qorǵaý, sot júıesindegi ashyqtyq pen móldirlikti áli de damyta túsý kerektigine toqtaldy. Al partııa belsendileriniń biri Ý.Qaısarov aldymen zalda oblystyq ishki ister basqarmasynyń basshysy Jandilda Maqanovtyń, taǵy basqa da ákimshilik qyzmetkerleriniń otyrǵanyn baıqap, «bul – demokratııanyń kórinisi» dep rızashylyq bildirdi. Munan keıin Jalpyulttyq sosıal-demokratııalyq partııa belsendileri men qostanaılyq saılaýshylar arasynda ekonomıka, áleýmettik máseleler jóninde suraq-jaýap áńgime órbidi. Názıra JÁRIMBETOVA, «Egemen Qazaqstan». QOSTANAI.