Innovasııalyq jobalarǵa jol ashyq

Elimiz ınnovasııalyq jolmen damýdy myqtap qolǵa alǵan. Onyń alǵashqy nátıjeleri kóńil qýantady. Bul jóninde Ortalyq kommýnıkasııalar qyzmetinde ótken baspasóz máslıhatynda «Tehnologııalyq damý jónindegi ulttyq agenttik» AQ basqarma tóraǵasynyń orynbasary Jumataı Sálimov aıtty. Ulttyq agenttik ınnovasııalyq damý saıasatyn júzege asyrýshy ekenin jetkizgen spıker, osy ba­ǵyt­ta Memleket basshysy alǵa qoı­ǵan maqsattardy oryndaý ná­tıjeli bolyp jatqanyna toqtaldy. «Qazirgi tańda ınnovasııalyq jobasyn usynyp, kórsetýge jáne ony júzege asyrýǵa barlyq jaǵ­daı jasalyp jatyr deýge bolady. Ol úshin bizdiń tarapymyzdan barynsha qoldaý men kómek kór­se­tiledi. Elimizdiń ǵalymdary men ónertapqyshtary kez kelgen jańa­lyǵyn kórsetip, onyń paıdaly ekenin dáleldeı alsa ony jekeshe­lendirip, patenttep alýyna biz kó­mektesemiz», dedi J.Sálimov. Basqarma tóraǵasynyń kel­tirgen málimetterine súıen­sek, ót­ken jyly 462 ótinim kelip túsipti. Bul rekordtyq kórsetkish kórinedi. Olardyń ishinde sarapshylardyń irikteýinen ótip, is qorytyndysy boıynsha jalpy somasy 1 mlrd. 623 mln. teńgeni quraıtyn 51 joba naqty qoldaýǵa ıe bolypty. «2013 jyly 188 ótinim kelip túsip, 822,8 mln. teńgege 44 kelisimge qol qoıyldy. Al burnaǵy jyly biz 280 ótinimdi qabyldadyq. Onyń ishinde jalpy somasy 641,1 mln. teńgeni quraıtyn 38 joba grantqa ıe boldy. Endi byltyrǵy jylǵa kelsek, dál qazirgi ýaqytta 185 ótinim sarapshylardyń qa­raýynda iriktelip jatyr. Bul jumys osy birinshi toqsannyń aıaǵyna deıin máresine jetedi dep otyr­myz. О́tinimder sanynyń munsha­lyqty kóbeıýine jobalardy qar­jylandyrý máselesiniń jaq­sarýy men elimizdiń 8 óńirinde orna­lasqan júzden astam otandyq kásip­oryndarmen júrgizilgen nasıhat jumystary áser etti dep oılaımyz», dedi tóraǵa orynbasary. «Tehnologııalyq damý jónin­degi ulttyq agenttik» AQ-tyń máli­metine qaraǵanda, grant alýshy­lardyń arasynda «Ǵalam», «Elek­trovoz qurastyrý zaýyty» jáne «Swissgrow» sekildi kompanııalar bar. Belgili bolǵandaı, «Ǵalam» JShS ǵaryshtyq apparattar úshin qajetti kún sáýlesiniń qýatyn anyqtaıtyn qurylǵyny óndiretin jańa tehnologııany engizýde. «Granttyq baǵdarlamanyń naqty tıimdiligi týraly aıtatyn bolsaq, 2015 jyly ınnovasııalyq jobalardy júzege asyrý barysynda 800-ge jýyq jumys orny, onyń ishinde 403-i kásiporyndar­da, 343-i startap jobalardyń negi­zin­de quryldy. Grant alýshylar ótken jyly 1,25 mlrd. teńge kóleminde salyq tóledi, 22 mlrd. teńgeniń ónimin shyǵardy. Bularmen birge, syrtqy naryqqa shyǵarylǵan eksport kólemi 8 mlrd. teńgege jýyqtady», dedi J.Sálimov. Elimizdegi ınnovasııa jáne ózge de túrli ǵylymmen shuǵyldanatyn jandarǵa naqty qoldaýlar kór­se­tilip otyrǵanyn aıtqan spıker, álemge áıgili aǵylshyn ǵalym-astrofızıgi Stıven Hokıng qazaq­standyq jas ǵalym Isaak Mýsto­pýlomen kezdesýge kelisimin ber­genin aıtty. Byltyr Taraz qala­synyń 14 jastaǵy turǵyny Isaak Mýstopýlo «Úılesimdilik teorııa­sy» ǵylymı jumysyn ázirlep, oqýshylar arasynda ótetin Ult­tyq ınnovasııalyq jobalar kon­kýr­synyń arnaıy syılyǵyna ıe bol­ǵan edi. Sol kezde baıqaý uıym­das­tyrýshylary jas ǵalymnyń armanyn oryndaýǵa kómektesetinderin aıtqan. Sondaǵy Isaaktyń armany, áıgili ǵalym-astrofızık, múgedek arbasyna tańylyp otyrsa da, ǵylymda asa mańyzdy ja­ńalyqtar ashqan Stıven Ho­kıngpen kezdesý edi. «Stıven Ho­kıngtiń hatshylyǵynan jaýap kútip otyrmyz. Ol kiside ýaqyt tapshy ekeni málim. Dese de, olar qazaqstandyq jas ǵalymmen kezdesýge qyzyǵýshylyq tanytyp otyr. Tipti Isaakpen kezdesip, onyń ǵylymı jumysyn talqylaýǵa da daıyn. Buǵan qosa, oqýshyǵa brıtandyq ǵylym murajaıyn kórsetip, Kembrıdjge aparýdy da josparlaǵanbyz», dedi basqarma tóraǵasynyń orynbasary. Nurbaı ELMURATOV, «Egemen Qazaqstan».