Partııa músheleriniń qatary tolyqty

«Birlik» saıası partııasynyń respýblıkalyq saılaýaldy shtabynda partııaǵa jańa múshelerdi qabyldaýdyń saltanatty rásimi ótti. Sharaǵa Bolat Baıqadamov, Mu­rat Raev, Roza Qýanyshbaeva, Tólegen Qýanyshev, Mu­rat Qo­jamqu­lov sekildi Parlament Májilisiniń depýtat­ty­ǵy­nan úmit­ker­ler men partııanyń ózge de ókilderi men jastar qatysty. Partııa tóraǵasynyń orynbasary B.Baıqadamov óz sózinde Astanada aqpan aıynda partııa qataryna ótý jóninde 5 ótinish túsip, olardyń barlyǵy quptalǵan. «Birlik» quramyna ótkisi kelgen erikti azamattardyń jasy 30 ben 65 aralyǵynda eken. Olardyń árqaısysy saltanatty túrde partııalyq bıletke ıe boldy. Partııanyń jańa músheleri «Taza nıet! Adal qyzmet! Taza orta!» atty urandy qoldaıtyndaryn, osy ıdeıany júzege asyrýǵa ózderiniń bar kúsh-jigerlerin jumsaıtyndaryn jetkizdi. Máselen, Aǵybaı Halet degen azamattyń aıtýynsha, «Birliktiń» saılaýaldy baǵdarlamasymen tanysqannan keıin onyń partııa qataryna qosylýǵa degen ynta-nıeti oıanǵan eken. «Birliktiń» bizdiń elimizdi áleýmettik, mádenı, ekonomıkalyq jaǵynan jańa sapalyq deńgeıge kóterýge degen qulshynysy ǵana emes, bolashaq urpaqqa ekologııasy taza jerdi qaldyrýǵa degen umtylysy da qyzyqtyrdy», – deıdi A. Halet. Al partııanyń Aqmola óńirindegi fılıalynyń tóraǵasy, depýtattyqqa kandıdat M.Qojamqulov qazirgi tańda partııa aldynda turǵan basty mindet – saılaýaldy baǵdarlamany tolyqtaı júzege asyrý, sebebi, bul baǵdarlama qazaqstandyqtardyń ómir sapasyn arttyrýǵa baǵyttalǵanyna toqtaldy. «Sondyqtan, bul baǵdarlamanyń otandastar tarapynan qoldaý tabýy ǵana emes, partııanyń tynys-tirshiligine belsendi túrde aralasý da mańyzdy», – dedi ol. «Birlik» partııasynyń qataryna jańa múshelerdi qabyldaý úderisi tek elordada ǵana júrgen joq. Iаǵnı, partııa quramy elimizdiń basqa da óńirlerindegi azamattarmen tolyǵyp, ondaǵan azamat partııa qataryna qosyldy, olarǵa da jańa partııalyq bıletter tabystaldy. Sondaı-aq, partııa músheleri úgit-nasıhat jumystary aıasynda «Birlik» – ár úıge» aksııasyn ótkizdi. Shara barysynda «Birlik» partııasynyń ókilderi birneshe úıge baryp, saılaýaldy baǵdarlamany túsindirdi, azamattardyń usynys-tilekterin tyńdady. Partııa múshesi R.Qýanyshbaeva «Birliktiń», ásirese, otbasy ınstıtýtyna aıryqsha mán beretinin, sebebi, ol myqty memleket pen qoǵamnyń qalyptasýyna negiz bolatynyn jetkizdi. «Bizdiń saılaýaldy baǵdarlamamyzda Qazaqstan halqynyń ulttyq salt-dástúrin jáne qundylyqtaryn saqtaý mindeti tur», – dedi ol. Láıla EDILQYZY, «Egemen Qazaqstan». Astana.