«Ǵalymdar úıi» paıdalanýǵa berildi

Kókshetaý qalasynda Sh.Ýálıhanov atyndaǵy Kókshetaý memlekettik ýnıversıtetiniń professorlyq-oqytýshylar quramyna arnalǵan 26 páterlik turǵyn úı paıdalanýǵa berildi. Saltanatty sharaǵa Aqmola oblysynyń ákimi Sergeı Kýlagın qatysyp, qýanysh ıelerin quttyqtady. Elimizdiń ózge óńirlerinen qyzmetke alynǵan ǵylymı ataǵy men úlken kásibı tájirıbesi bar professorlar men oqytýshylardy turǵyn-jaımen qamtamasyz etý úshin KMÝ oblys ákiminiń qoldaýymen, Sátbaev kóshesindegi ákimshilik ǵımaratynyń qury­lysyn qaıta júrgizgen bolatyn. Jumys nebári bes aıda aıaqtalyp, jaıly qonysqa aınaldy. Kóp qabatty turǵyn úıdiń paıdalanýǵa berilýi oqý ornynyń ǵylymı áleýetin jaqsartyp, mamandar daıarlaýdyń sapasyn arttyratyny anyq. «Ǵalymdar úıi» qurylysynyń jobalaý-smetalyq qujattary men kúrdeli jóndeý jumystary ýnıversıtet qarjysymen atqaryldy. Jańa ǵımarat ınjenerlik kommýnıkasııamen jáne as bólmesi jıHazdarymen tolyq qamtylǵan. – Qazirgi kúni qalada 45 páterlik bes úı daıyndalýda. Munda bıýd­jettik sala qyzmetkerleri, sondaı-aq, muǵalimder, dárigerler, jas mamandar qonystanatyn bolady. Buǵan qosa, jyl saıyn muqtaj balalar men balalar úıleriniń túlekterine 45-50 páter bólý jóninde sheshim qabyldandy. Sońǵy 6-7 jylda bul toptyń ókilderine nebári 170 páter berildi. Al kezekte 1700 adam tur. Son­dyqtan, bul ózekti máseleni sheshý únemi nazarda ustalatyn bolady. Bul oraıda Kókshetaý memlekettik ýnıversıtetiniń bılikpen ózara áriptestik qadamdary rızashylyqqa bóleıdi. Mundaı bastamalar jan-jaqty qoldaý tabýy tıis, – dedi óńir basshysy óz sózinde. Baqbergen AMALBEK, «Egemen Qazaqstan». Aqmola oblysy.