Synaq

Taldyqorǵan qalasy mańynda ornalasqan avıasııalyq bazada jaýyngerlik daıarlyq josparyna sáıkes oqý-jattyǵý ushýlary uıymdastyryldy. Synalar sátte syr bermeýge baryn salyp baqqan jas ushqyshtar joǵary kórsetkishterge qol jetkizdi. Olardyń teorııalyq bilimderin tájirıbemen ushtastyrýlaryna jan-jaqty jaǵdaı jasaǵan ustaz-nusqaýshylar shákirtteriniń sheberligin shyńdap qana qomaı, denderiniń saý, kóńil-kúıleriniń kóterińki bolýyna da aıryqsha na­zar aýdarǵanyn atap ótkenimiz oryndy. Aspandaǵy asa qıyn emtıhandy oıdaǵydaı eńsergen oǵlandar qatarynda aǵa leıtenant Jasulan Shúrmenov te bar. Ol Sý-30 SM ushaǵyn urshyqsha úıirip, óziniń alǵashqy samǵaýyn abyroımen aıaqtady. Zamanaýı tehnıkany zeńgir kókte qalaýynsha zaýlatqan qanatty azamat ańsaǵan armanyna qol jetkizgendeı qýanyshy qoınyna syımaı jerge qondy. «Qııaǵa qushtar qyrandaı meniń áriptesterim árdaıym bıikterdi baǵyndyrýǵa talpynary talassyz. Bizge bilgenderin úıretýden jalyqpaıtyn komandırlerimiz de soǵan tilektes. Sondyqtan, aldaǵy ýaqyttarda ózimniń kásibı biliktiligimdi arttyryp, tańdaǵan ma­mandyǵymnyń tarlany atanýǵa aıan­baı kúsh salmaqpyn», dedi saıyp­qyran sarbaz aǵynan jarylyp. 2012 jyly Áýe qorǵanysy kúsh­teriniń áskerı ınstıtýtyn támam­daǵan Jasulannyń jasyndaı jar­qyldap, kózdegen maqsatyna kóp keshikpeı jetetinine senim mol. «Egemen-aqparat».