Maqsat – adamdar júregine jol tabý

Qazaqstan Kommýnıstik halyq partııasynyń (QKHP) saılaýaldy shtabynyń belsendileri Taldy­qor­ǵan qalasynda kezekti is-sharalaryn ótkizdi. Olar jer­gilikti jýrnalısterdi oblystyq fılıaldyń keńsesine shaqyryp, úgit-nasıhat jumystarynyń júrgizilý barysymen tanystyrdy. Bul aksııany kommýnıster «esikten esikke deıin» dep atady. Jýrnalıster aldynda QKHP atynan Májilis depýtattyǵynan úmitkerler qatarynda tizimge engizilgen Sáýle Baǵırova sóılep, aımaqtaǵy úgit-nasıhat jumysynyń barysymen tanystyrdy. Búgingi tańda úgit-nasıhat jumystarynyń 20 kúni artta qaldy. Biz óz jumysymyzdyń barysynda partııanyń respýblıkalyq shtaby jibergen barlyq nasıhat quraldaryn saılaýshylar nazaryna jetkizýdemiz. Partııanyń jas belsendileri poshta jáshikterin ǵana paıdalanyp qoımaı, úgit-nasıhat paraqshalaryn turǵyndardyń esigine deıin jetkizip, qoldaryna ustatyp ketýde. Búgingi aksııamyzdy «esikten esikke deıin» dep atap otyrǵan sebebimiz: sol jumystarymyzdy kórsetý edi, dedi S.Baǵırova. Sondaı-aq, úgit-nasıhat jumys­taryn júrgizýge oblystyq partııa fılıa­lynyń belsendilerimen qatar, aýyl­dyq aýdandardaǵy komıtetterdiń bel­sendileri de jumyla kiriskeni jetkizildi. Olar árbir úıge deıin kirip, saılaýshylarmen emen-jarqyn áńgimelesip, kommýnıstik partııa baǵdarlamasynyń ozyqtyǵyn, onyń qarapaıym halyqtyń múddesin qoldaýdy óziniń basty maqsaty etip alǵanyn túsindiredi eken. Kún saıyn belsendilerimiz 150 páterdiń esigin qaǵyp, júzdegen aýlalarǵa kirip, úgit-nasıhat paraqshalaryn taratýda. Onyń ústine, ruqsat etilgen barlyq taqtaılar men qabyrǵalarǵa kem degende 100 nasıhat quralyn japsyramyz. Oblys pen aýdan ortalyqtarynda partııanyń bılbordy da ilinip, kórgen adamnyń kózin tartyp tur, dedi Sáýle Baǵırova sóziniń sońynda. Odan keıin jýrnalısterdi Tal­dy­qorǵan qalasynyń kóshelerimen oblys­tyq partııa komıtetiniń ekinshi hatshysy Oljas Ybyraıymov alyp júrdi. Ol jýrnalısterge partııa belsendileri jumystarynyń nátıjeleri retinde úgit-nasıhat quraldarynyń barlyq jerde jarqyrap turǵanyn kórsetti. Bizdiń belsendilerimizdiń aldynda endi shamaly ǵana turǵyn úılerdi aralap shyǵý mindeti tur. Osy ister atqarylsa, qala men aýdan saılaýshylarynyń bári de QKHP nasıhatymen tegis tanys bolady, dedi ol jýrnalısterge. QKHP oblystyq fılıaly bel­sen­di­leriniń zańmen ruqsat etilgen sheńberde sheber jumys istep jatqandary Tal­dy­qor­ǵannyń barlyq jerinde menmundalap turdy. Jaqsybaı SAMRAT, «Egemen Qazaqstan». Almaty oblysy.