Oqyp, daıyndyqtan ótti

Sońǵy kúnderi Májilis pen máslıhattar saılaýlaryna halyqtyń nazary kúrt artty. Sebebi túsinikti, daýys berýge sanaýly kúnder qaldy. Shyǵysqazaqstandyq turǵyndar elimizdegi Saılaýdy baıqaý jónindegi respýblıkalyq qoǵamdyq komıssııanyń qyzmetine belsendi túrde qyzyǵýshylyq tanytyp, saılaý úderisiniń ashyqtyǵyn qamtamasyz etý jáne saılaý naýqany barysyndaǵy zań buzýshylyqtardy boldyrmaý úshin saılaýda baıqaýshy bolý múmkindigine aıryqsha kóńil bólip otyr. О́ńirde táýelsiz baıqaýshylarǵa arnalǵan oqytý semınarlary jedel qarqynmen júrgizildi. Máselen, О́skemen qalasynda – 110, Semeı qalasynda – 124, Zyrıan aýdanynda – 78, Úrjarda 73 baıqaýshy daıyndalsa, Rıdder, Kýrchatov qalalary men Abaı aýdanynda da saılaýdy baıqaýshylardy ázirlegen semınarlar ótkizildi. Tutastaı alǵanda, oblys kóleminde 800-ge jýyq táýelsiz baıqaýshy oqytyldy. Shyǵys Qazaqstan oblysyndaǵy saılaýdyń ótý kezeńderin baqylaý jónindegi óńirlik ortalyǵynyń jetekshisi Lıýdmıla Geısmannyń aıtýynsha, baıqaýshylar is-áreketiniń tabıǵaty kópshiliktiń kóńilinen shyǵa bermeıtinine qaramastan, oblys turǵyndary Parlament Májilisi men máslıhattar saılaýlaryna baqy­laýshy retinde qatysýǵa jáne óńirlik ortalyqtyń qyzmetine úlken qyzyǵýshylyq tanytty. – Baıqaýshy bolýǵa negizinen dárigerler, muǵalimder men zeınetkerler múddeli boldy. Olar qajetti qujattardyń tolymdylyǵy men sapasyn, saılaýshylar tizimin, ýchaskeler shekarasy, qajetti alańdar men qyzmetkerlerdiń bolýyn qadaǵalaıdy, – dedi L.Geısman. Sondaı-aq, saılaýdyń ótý kezeńderin baqylaý boıynsha óńirlik ortalyǵynyń qyzmetkerleri men óńirlik shtab músheleriniń kezdesýi barysynda saılaý kúnindegi partııa atynan qatysatyn baıqaýshylardyń quqyǵyna, óńirlik shtab pen baıqaýshylardyń ózara tehnıkalyq qyry, senim bildirilgen adamdar men baıqaýshylar arasyndaǵy baılanysy talqylandy. – Bizdiń negizgi mindetimiz – saılaý­shylar men partııalar arasyndaǵy teńdikti jáne saılaýdyń ádildigin qamtamasyz etý. Baıqaýshy saılaý ýchaskesindegi oqıǵalardy zamanaýı quraldarmen tirkeýdi paıdalanyp, qajettilik týǵan jaǵdaıda áleýmettik jelilerdi belsendi túrde qoldanýy múmkin. Bizdiń baıqaýshylar óz taraptarynan asa mańyzdy jáne paıdaly mıssııany sátimen atqarady dep úmittenemiz, – dedi óńirlik ortalyq jetekshisi. Dýman ANASh, «Egemen Qazaqstan». О́SKEMEN.