Mindetterin jetik biledi

Atyraý oblysynda 234 saılaý ýchaskesi bar. Qazir óńirdegi barlyq ýchaskelerge 243 baıqaýshy tirkelip, olar ádistemelik semınar-trenıngterden ótýde. Baıqaýshy ókilettigi berilgen azamattar aldaǵy Parlament jáne jergilikti máslıhattar saılaýlary naýqanyna tyńǵylyqty daıyndalyp, saılaý zańnamalary men halyqaralyq talaptardyń saqtalýyn qadaǵalaýǵa beıimdelip jatyr. Osyǵan oraı Atyraýda «Qazaqstan Respýblıkasyndaǵy saılaýdy baıqaý jónindegi respýblıkalyq qoǵamdyq komıssııa» respýblıkalyq qoǵamdyq birlestiginiń múshesi Sultan Qalıevtiń qatysýymen Atyraý qalasynda jáne aýdandarda «Baıqaýshynyń saılaý úderisindegi róli» taqyrybynda arnaıy semınar ótkizildi. – Bul semınardyń basty maqsaty – baıqaýshy óki­let­tigi berilgen azamattardy aldaǵy jaýapty iske daıyn­daý, is barysyndaǵy saılaý zań­dy­lyqtary men halyqaralyq normalardyń saqtalýyn qada­ǵalaýǵa beıimdeý, – deıdi Saı­laýdy baıqaý jónindegi respýb­lıkalyq qoǵamdyq komıssııasynyń Atyraý oblys­tyq fılıalynyń basshysy Shynargúl Qaıyrova. Onyń aıtýynsha, elimizdegi saılaý barysyn baıqaýshy eń aldymen «Saılaý týraly» Konstıtýsııalyq zańdy jete bilýi shart. Olardyń basty mindeti – saılaý prosesiniń zańdylyq talaptarǵa saı jáne ádil ótýin qadaǵalaý. Osy maqsatta olar qazir qala-aýdan aýmaqtarynda óz ókilettigine sáıkes jumys júrgizip jatyr. Baıqaýshylardyń aıtýynsha, ázirge oblys aýmaǵynda qandaı da bir zańsyzdyq tirkelmegen ári saıası uıym ókilderi arasynda da qyrǵı-qabaq qatynas kezdesken joq. Baıqaýshylardy daıyndaý isi kelesi sársenbige deıin tolyq aıaqtalady, deıdi qoǵamdyq komıssııa ókilderi. – Qazir 180 baıqaýshy se­mı­nar-trenıngten ótti, qalǵan baıqaýshylardy qysqa merzimde ótkizýdi josparlap otyr­myz. Sonymen qatar, Aty­raý oblystyq aýmaqtyq saı­laý komıssııasynda jáne saılaý ýchaskelerinde bolyp, saılaýaldy daıyndyq jumys­tarymen tanystyq. Saılaý komıssııasynyń jumystary talapqa saı, ótken jyldarǵa qaraǵanda partııalar arasynda saılaý mádenıetiniń óskendigi baıqalady, partııalardyń óza­ra qarym-qatynastary joǵary deńgeıde, – dep atap ótti Shy­nargúl Qaıyrova. Joldasbek ShО́PEǴUL, «Egemen Qazaqstan». ATYRAÝ.