«Máńgilik Eldiń» Shalqardaǵy shýaqty sátteri

Shalqarlyqtar Qazaqstan Respýblıkasy Táýelsizdiginiń 25 jyldyǵyna arnalǵan mereıtoılyq sharalar aýqymynda qalyptastyrylǵan «Máńgilik El» áleýmettik poıyzyn qonaqjaılyqpen qarsy aldy. Bul aýdanda 12 aýyldyq okrýgti qamtıtyn 46 500-den astam halyq turady. Shalqarǵa poıyz óńirdiń Áıteke bı aýdanyna, Aqtóbe qalasyna aıaldaǵannan keıin keldi. Maqsaty – áleýmettik baǵytta kómekter kórsetý, jergilikti turǵyndarǵa «100 naqty qadam» Ult Jospary jaıynda túsindirý jáne aýyl turǵyndarymen kezdesip, suraqtaryna jaýap berý. Qonaqtardy qarsy alǵan aýdan ákimi Erbol Danaǵulov qasıetti Shalqar jerine taban tiregen el birligin tý etip júrgen azamattardyń qadamdaryna sáttilik, eńbekterine tabys tiledi. Shashý shashylyp, aýdan kórkemónerpazdary bı bılep, óleń-jyrlaryn arnady. Shalqar qalalyq ardagerler uıymynyń tóraǵasy Amankeldi Qalybaev aq batasyn berdi. «Máńgilik El» áleýmettik poıyzynyń jetekshisi Ámirjan Álpeıisov kórsetilip jatqan shalqarlyqtardyń qurmeti Elbasy N.Á.Nazarbaevtyń el birligin qalyptastyrýdaǵy ıgi isine degen qurmet dep baǵalady. Jáne qazaqy salt-dástúriniń qaımaǵy buzylmaǵan Shalqar eline qadam basqandaryna qýanyshty ekenderin bildirdi. «Biz munda óz Otanyn súıetin jandarmen kezdesip otyrmyz. Sizderdiń júzderińizden erteńgi kúnge degen senimdi, eldiń órkendeı túsýi úshin jumys isteýge degen qulshynysty kórip turmyz. 2016 jyl – aıryqsha jyl, biz ony áleýmettik problemalardy sheshýmen bastap otyrmyz», – dedi Á.Álpeıisov. Poıyzdyń quramynda Qa­zaq­stan halqy Assambleıasynyń músheleri, ǵalymdar, sarapshylar, dárigerler kelgen. Olardyń árqaı­synyń halyqqa áleýmettik kómek kórsetý, bes ınstıtýttyq reformany túsindirý, konsýltatıvtik járdem berý jóninde óz josparlary bar. «Máńgilik El» áleýmettik poıyzynyń músheleri Shalqarǵa taban tiresimen óz salalary boıynsha topqa bólinip, jos­parly jumystaryna kiristi. Atalmysh poıyz kele jatyr degennen qulaǵdar bolǵan jergilikti turǵyndar onyń maqsat- mindetin jergilikti gazetterden oqyp, aldyn ala bilip otyrǵan edi. Sondyqtan bolar, poıyz quramyndaǵy árbir sala mamandarymen júzdesýshiler qatary kóp boldy. Dárigerler aýdandyq emhanada turǵyndardy qabyldap, tegin keńes berdi. Kelgen medısına ókilderine bir kúnde 602 adam qaralyp, keńes alǵan. Olardyń qatarynda basty baılyqtyń bútindigi jolynda tabanyn tozdyryp júrgen jandar da bar. Bilim jáne ǵylym mınıstrligi jáne jastar saıasaty departamentiniń ókilderi №1 mektep-gımnazııada bolyp, aýdan jastarymen kezdesti. Qonaqtardy 92 jyldyq tarıhy bar qara shańyraqtyń basshysy Amangeldi Qonaqbaev qarsy alyp, mekteptiń ótkeni men búgini týraly aıtyp berdi. Aýdandyq jas­tar resýrstyq ortalyǵynyń atsalysýymen mekteptiń akt zalynda el Táýelsizdiginiń 25 jyldyǵyn basty uran etken «Aıbyny asqaq azat el» atty merekelik shara ótti. «Táýelsizdikke – taǵzym» atty aýdandyq jas aqyndar aıtysynda Aqtoǵaı aýyldyq okrýginen kelgen Qaırat Qoıshybaev bas júldege ıe bolsa, I orynǵa Sarysaı aýylynyń turǵyny Danııar Keýlimjaı laıyqty dep tanyldy. «Máńgilik El» áleýmettik poıyzynyń Shalqar aýdanyndaǵy saltanatty qorytyndysy Mádenıet úıinde úlken merekege ulasyp, meımandar men el azamattary estelik sýretterge tústi. Osy bir shýaqty sátter shalqarlyqtardyń esinde ádemi ásermen qaldy, olar aldaǵy saılaýda eldiktiń birligin, yntymaqtyń jarastyǵyn nyǵaıtatyndyqtaryn aıqyn ańǵartty. Satybaldy SÁÝIRBAI, «Egemen Qazaqstan», Muhtar MYRZALIN, jýrnalıst. Aqtóbe oblysy.