Qoǵam qoldaǵan aksııa

Keshe Prezıdent janyndaǵy Ortalyq kommýnıkasııa­lar qyzmetinde osy jyldyń 5 aqpanynda bastalǵan el Táýelsizdiginiń 25 jyldyǵyna arnalǵan «25 jyl: Bir El. Bir Taǵdyr» atty patrıottyq ınternet-aksııanyń barysy týraly brıfıng ótti. Brıfıngte el.kz otandyq áleý­mettik jelisiniń qyzmetkeri Aıgúl Shernııazova atalǵan aksııanyń qoǵam tarapynan qoldaý taýyp otyrǵanyn aıta kelip, shara barysynda belsendilik tanytyp jatqan aımaqtardy atap ótti. «Qazirgi tańda 25.el.kz servısi arqyly 103 myńnan astam avatar (ınternet paıdalanýshynyń grafıkalyq usynysy nemese sýreti) bezendirildi. Aksııamyzdyń geografııalyq aýqymy kún sanap artyp keledi. Sharaǵa AQSh, Qytaı, Nıderland, Fransııa, Qyrǵyzstan sekildi elderdegi qandastarymyz da belsene qatysýda. Al elimizdegi qalalar boıynsha Astana men Almaty shaharlary kósh bastap keledi. Bezendirilgen avatarlardyń 38 paıyzy osy eki qalaǵa tıesili. Belsendilik jóninen kelesi kezekte Ońtústik Qazaqstan, Qaraǵandy jáne Almaty oblystary tur. Úzdik ondyq qatarynda Atyraý, Aqtóbe, Mańǵystaý, Shyǵys Qazaqstan jáne Aqmola oblystary bar», – dedi A.Shernııazova. Sondaı-aq, spıker avatar be­zen­dirý aksııasyna qatysqan azamat­tardyń 50 paıyzdan astamy 18-24 jas aralyǵyndaǵylar ekenin jetkizdi. «Táýelsizdiktiń 25 jyldyǵyna oraı iske qosylǵan avatar bezen­dirý aksııasyna 18-35 jas ara­ly­ǵyndaǵy jastar belsendi qatysyp otyr. Aǵa býyn ókilderi de jańa trendti jaqsy qabyldaýda. Máselen, qazirgi tańda aksııanyń 17 paıyzdan astam qatysýshysy 35 jastan asqan azamattar. Al jal­py avatarlaryn bezendirgen aza­mattardyń teń jartysynan kóbi, ıaǵnı 50 paıyzdan astamy 18-24 jas aralyǵyndaǵy azamattar. Bir qy­zyǵy, áıelder qaýymy er adam­darǵa qaraǵanda, avatarlaryn eki ese kóbirek bezendiredi eken. Iаǵ­nı, paı­dalanýshylardyń 68 paıyzy názik jandylar», – dedi ol. Sonymen qatar, A.Shernııazova qoldanýshylar óz avatarlaryn uıaly telefon arqyly saıtqa kirip be­zendiretinin aıta kelip, 25.el.kz servısinde 16 túrli patrıot­tyq naqyshtaǵy logotıp ornalas­ty­rylǵa­nyn, qoldanýshy óz qalaýy boıyn­sha olardyń kez kelgenin tańdap, óz avataryn bezendire alatynyn jetkizdi. Aıta keteıik, bıylǵy 5 aqpanda el Táýelsizdiginiń 25 jyldyǵyna ar­nalǵan «25 jyl: Bir El. Bir Taǵ­dyr» atty patrıottyq ınternet-aksııa bastalǵan bolatyn. Qazir atalǵan aksııa jalpyhalyqtyq deńgeıge jetti dep aıtýǵa tolyq ne­giz bar. Búginge deıin áleýmettik jeli­lerdiń 100 myńnan astam qolda­ný­shysy 25.el.kz áleýmettik servı­siniń kómegimen óz avatar­laryn merekelik sımvolmen bezen­dirip úlgergen. Joldybaı BAZAR, «Egemen Qazaqstan». Astana.