«Aıtar alǵysymyz sheksiz!» – deıdi qart ana

«Egemenniń» Oral qalasyndaǵy tilshi qosynyna jasy ulǵaıǵan ana keldi. Egdelik – qýanatyndaı, qol soǵatyndaı qubylys emes. Beli de búgilip bara jatqandaı kórindi. Qasynda taǵy bir jas áıel bar. Ol qart ananyń qyzy bolyp shyqty. Kelgen sharýańyzdy aıta otyryńyz, apa, dedik biz ol kisige yqylas tanyta. – Qaraǵym, biz myna turǵan qyzym Bıbigúl ekeýmiz Tasqala aýylynan «Ege­menge» arnaıy kelip otyrmyz. Aýdan ortalyǵyndaǵy shetkeri kóshelerdiń biri – Shevchenkoda turamyz.Taǵy da osy mańaıda Stadıon jáne Ahmetqalıev atyndaǵy kósheler bar. Osy úsh kósheniń turǵyndarynyń deni zeınetkerler deýge bolady. Osy kezge deıin kári qoıdyń jasyndaı ǵumyrymyz qalǵanda aýyz­sý azabyn kórip keldik. Ony qystyń kózi qyraýda aýyl shetindegi shegen qudyqtan bıdonmen tasydyq. Onyń ózi móldir emes, laı sý edi. Tipti, sol laı sýdyń ózine zar boldyq. О́ıtkeni, shelektep ala bergen soń sýy bitip qalady. Sonymen birge, kóshe joldary da shuryq-tesik bolatyn. Tipti, elektr baǵanalary da tartylmaǵan edi. Taıaýda úıimizge sý qubyry tartylyp, aýyz-sý azabynan bir-aq kúnde qutyldyq. Buǵan qosa jol da jóndeldi. Úıimizdiń irgesine jaryq ta tartyldy. Sondyqtan, ótinishimizdi aıaqsyz qaldyrmaǵan is basyndaǵy azamattarǵa degen rızashylyǵymyzdy «Egemen» arqyly jetkizsek pe dep kelip edik, – dedi ózin Qymbat Ábilǵazıeva dep tanystyrǵan seksenniń seń­girine shyqqan ana. – Nesi bar, oıyńyz durys eken. Jaq­synyń jaqsylyǵyn aıt, nury ta­sysyn demeı ma? Endeshe, turmystaryńyzdyń túzelýine kómek kórsetkenderdiń aty-jónderin atap jiberseńiz, – dedim men osy arada. – Birinshiden Tasqala aýdanynyń ákimi Sanjar Álıevtiń aty-jónin ataǵym keledi. Ol turǵyndardyń jına­lysyna úsh ret kelip qatysyp, janaı­qaıymyzǵa túsinistikpen qulaq asty. Ári shuǵyl sheshim qabyldady. Buǵan qosa istiń júrý barysyn ózi tikeleı muqııat qadaǵalap otyrdy. Tasqala aýyldyq okrýginiń ákimi Svetlana О́temisova men kommýnaldyq-sharýashylyq kásipornynyń basshysy Kenjeǵalı Bısalıevke de al­ǵysymyz sheksiz. Ári muny tek meniń ǵana emes, barlyq kóshe turǵyndarynyń atynan aıtylǵan alǵys dep qabyldaýyńyzdy suraımyn. Qymbat apa, búginde elimizde turǵyn úı-kommýnaldyq sharýashylyǵyn órken­detý, bul turǵyda turǵyndarǵa qo­laıly turmystyq jaǵdaılar týǵyzý jóninde jer­gilikti atqarýshy organdarǵa júktelgen jaýap­kershilik joǵary. Siz esimderin ataǵan Tas­qala topyraǵynyń basshy azamattary osy senim men jaýapkershilik údesinen shyǵa bilgen eken. Bul amanatyńyzdy «Ege­men» ar­qyly jetkizýge ázirmiz. Buǵan alańdamańyz. Jolyńyz bolsyn, – dedim men ol kisige aýylyna qaıtar jolda. Sóıte qoıshy, aınalaıyn, dep apamyz alǵysyn qaıta-qaıta jaýdyrmalatyp esikke qaraı bettedi. Temir QUSAIYN, «Egemen Qazaqstan». Batys Qazaqstan oblysy, Tasqala aýdany.