Antqa adal azamat

Asqar sol kúni jumystan keshteý shyǵyp, úıine qaraı asyqty. О́zin taǵatsyzdana kútip otyrǵan jan jary Sánııaǵa, uly Sákenge, úsh aılyq qyzy Sabınaǵa jetkenshe jany tynysh tappaıdy. Jeńil kólik qoıý qarańǵylyqty qaq jaryp, qaladan shetkerileý jerdegi kúre joldan buryla bergeni sol edi, jer-dúnıeni solq etkizgendeı alapat gúrsil ony eriksiz jalt qaratty. О́rt sóndirý salasynyń kánigi mamany qarama-qarsy kelgen sheteldik mashınalardyń bir-birimen soqtyǵysyp, qatty soqqynyń saldarynan biriniń jol jıegine qaraı tóńkerilip túskenin qas-qaǵym sátte ańǵaryp, kóligin toqtata salysymen jedel kómekke umtyldy. Aýdarylyp jatqan «BMW» kóliginde jolaýshylardyń qımylsyz sulbalaryn birden baıqady. Eshqaısysy qozǵa­lar emes. Shamasy, aýyr jaraqat alyp, bolmasa oqys oqıǵadan eseńgirep qalsa kerek. Áskerı tártippen jedel qımyldap, aldymen aldyńǵy oryndyqta es-tússiz jatqan áıeldi qutqarýǵa kiristi. Osy kezde qaýipsizdik jastyǵyna qystyrylyp, ajal tyrnaǵynan aman qalǵan júrgizýshi de qol­ushyn berip, ekeýlep ony qaýipsiz jerge shyǵardy. Áıel taza aýamen keýde kere tynystap, kózin ashqanda bular qýanyp ketti. Ábjil qımylmen qalǵan jolaý­shylardy da bir-birlep alyp shyq­qannan keıin, dárigerler men polısııa qyzmetine habar berdi. Olar jetkenshe zardap shekkenderge medısınalyq, psıhologııalyq kómek kórsetýmen aınalysty. Keıin kólik ıeleriniń biri araq iship alyp, kólik róline otyrǵanyn estigende zyǵyrdany qaınady. Azamattyq qorǵanys maıory Asqar Ysmaǵulovtyń jol-kólik apaty kezinde basqasha qımyl tanytýy múmkin emes edi. Ol bul áreketin úlken erlikke baǵa­lamaıdy. Beıbit kezeńde kez­desetin qalypty, úırenshikti úrdiske sanaıdy. Qıyn jaǵdaıǵa tap bolǵan adamǵa kez kelgen qazaqstandyqtyń qor­ǵan bolaryna bek senimdi. Áriptesteri al­dynda úlken bedelge ıe onyń adamgershilik, ımandylyq qasıet­teri ózgelerge úlgi. Kókshetaý teh­nıkalyq ınstıtýtyn bitirgeli bir salada jemisti eńbek etip keledi. Jeke basynyń jaýapkershiligin, isiniń ornyqtylyǵyn basshylyq baǵalap, oblystyq «О́rt sóndirý jáne apattyq qutqarý jumystary qyzmeti» memlekettik mekemesiniń kadrlar jumysy bóliminiń jetek­shisi etip bekitti. Osydan eki jyl buryn bas maman bolyp júrgende mınıstrlik jarııalaǵan baıqaýda úzdikter qatarynan kóringen. Basqa da marapattary jeterlik. Qaraýyl bastyǵy qyzmetinde de «tilsiz jaýmen» talaı ret betpe-bet ushyrasyp, adamdar ómirine san márte arasha turǵan. Qaıda júrse de, biliktilik, bilimdilik kórsetý, adamdar ómirine qaýip týyndaǵanda erlikti emes, azamattyq paryzdy birinshi orynǵa qoıý, ózine júktelgen senimdi aqtaý onyń ómirlik qaǵıdasyna aınalǵan. Sol kúni jumystan kesh oral­ǵanyna esh ókinbeıdi. Bekerge ómir súrmegenin, adamdar aldyndaǵy bir mindeti oryndalǵanyn túsindi. Antqa adaldyq, bergen ýádege beriktik el múddesin joǵary qoı­ǵan azamatqa tán bolsa kerek. О́mir ESQALI, «Egemen Qazaqstan». Soltústik Qazaqstan oblysy. Sýretti túsirgen Talǵat TÁNIBAEV.