Astanada kúres túrlerinen Olımpıada joldamasy sarapqa salynady

ASTANA. 16 naýryz. 18-20 naýryz kúnderi Astana qalasynda kúres túrlerinen Azııa qurlyǵy boıynsha Rıo-de-Janeıro Olımpıadasyna irikteý týrnıri ótedi. Bul týraly Ulttyq shtattyq komandalar jáne sporttyq rezerv dıreksııasynyń baspasóz qyzmetine silteme jasaǵan egemen.kz tilshisi habarlady. Saıysqa qurlyqtyń 20-dan astam elinen palýandar qatysady dep josparlanýda. Olardyń arasynda Iran, Qytaı, Japonııa, Mońǵolııa, Ońtústik Koreıa jáne Úndistan syndy bizdiń palýandarǵa basty básekeles bolatyn elderdiń ókilderi bar. Astanadaǵy týrnırde alty salmaq dárejesi boıynsha Olımpıada joldamasy taratylady. Atap aıtqanda, grek-rım kúresinen – 59 kg, 66 kg, 75 kg, 85 kg, 98 kg, 130 kg, erkin kúresten – 57 kg, 65 kg, 74 kg, 86 kg, 97 kg, 125 kg jáne áıelder kúresinen 48 kg, 53 kg, 58 kg, 63 kg, 69 kg, 75 kg salmaqtaǵy palýandar joldamaǵa talasady. Osy salmaqtarda joǵaryda atalǵan elder Astanaǵa birinshi nómirli palýandaryn ákeletinin atap ótken jón. Aıta keteıik, búginde ulttyq qurama qorjynynda kúres túrlerinen 3 Olımpıada joldamasy bar. Olardy grek-rım kúresiniń sheberi Almat Kebisbaev (59 kg), taǵy bir «klassık» palýanymyz Dosjan Kártikov (75 kg) jáne erkin kúresten el namysyn qorǵaıtyn Artas Sana (57 kg) enshilegen bolatyn. Osyǵan baılanysty bul sportshylar elordadaǵy saıysqa qatyspaıdy. Al qalǵan salmaqtarda qurama jattyqtyrýshylary tek úzdikterge ǵana senim artyp otyr. Elaman Qońyr. Derek: Ulttyq shtattyq komandalar jáne sporttyq rezerv dıreksııasynyń baspasóz qyzmeti. Sýret: astana-sport.kz.