ALMATY. 16 naýryz. Búgin Almaty qalasyndaǵy Ǵabıt Músirepov atyndaǵy qazaq memlekettik akademııalyq balalar men jasóspirimder teatrynda Ermek Amanshaevtyń «Úzilgen besik jyry» psıhologııalyq dramasy jelisimen qoıylǵan «Ol» monospektakliniń tusaýkeseri ótedi. Bul týraly Ǵabıt Músirepov atyndaǵy teatrdyń baspasóz qyzmetine silteme jasaǵan egemen.kz tilshisi habarlady.
Qoıylymnyń kórkemdik-ıdeıalyq maqsaty – qazirgi áleýmettik qoǵamǵa saı sanaly urpaq, salıqaly tulǵa qalyptastyrý. Bul spektakldiń kórermenge rýhanı azyq berýde mańyzy zor bolady dep kútiledi.
Rejısser Erlan Káribaevtyń traktovkasy boıynsha jeke adamnyń taǵdyry arqyly búgingi ómirdegi áleýmettik qaıshylyqty kórsetedi. Basty róldegi akter Danııar Bazarqulov. Keıipkerdiń ómirden óz ornyn izdegen fılosofııalyq tolǵanysyn, shynaıy shyndyqtyń qupııasyn jan-jaqty qarastyrýǵa umtylǵan ishteı tartysy kimdi bolmasyn oılandyrary anyq.
Qazir atalǵan teatrdyń beldi akterleriniń birine aınalǵan Danııar Bazarquov Oral qalasyndaǵy Qazaq drama teatrynan Almatyǵa aýysqanyna jeti jyldan asty.
Akterdiń osy teatrdaǵy «Qara shekpen» spektaklindegi Tuzary – basty rólderiniń biri bolsa, 23 jasynda Romeo men Kalıgýlany oınaýǵa qol jetkizgen daryn ıesiniń shyǵarmashylyq qorjynynda úlkendi-kishili 45 ról bar. Otandyq kınematografııada da izi bastaldy. Al fızıologııalyq turǵydan da, psıhologııalyq jaǵynan aýyr Tuzardy ol óz deńgeıine jetkize oınap júrgen talant ıesi.
Aqparat pen tehnıka quraldarynyń damyǵan zamanynda adam janynyń qunsyzdanýy qazirgi kezde basty máselege aınalyp otyr. «Ol» mnospektakli osy týraly.
Aınash Esalı.
Derek, sýret: Ǵabıt Músirepov atyndaǵy qazaq memlekettik akademııalyq balalar men jasóspirimder teatrynyń baspasóz qyzmeti.
