• 16 Naýryz, 2016

Oralda naýryz aıynyń ortasynda joıqyn boran soqty

546 ret

kórsetildi

2 mın

oqý úshin

Egemen Qazaqstan

ORAL. 16 naýryz. Oralda naýryz aıynyń ortasynda joıqyn boran soqty. Bul týraly egemen.kz tilshisi habarlady. Naýryz aıy ortań belinen asqan kezde batysqazaqstandyqtar aıaq astynan kózdi ashtyrmaıtyn aqtútek boran soǵady dep oılamaǵan edi. Yshqyna soqqan jeldiń ekpini de atan túıeni jyǵardaı tym qatty boldy. Uıytqı soqqan jelmen jarysyp jaýǵan qar Oral óńiriniń qalasyn da, dalasyn da bir demde aq kórpege orady da tastady. Boran kezindegi joıqyn jeldiń áserinen Oral qalasynda jáne oblystyń birqatar jerinde elektr jelileri úzilip, kóshe boılaryndaǵy bılbordtardyń mata tektes materıaldary byt-shyt bolyp jyrtylyp jatty. 15 naýryz kúni keshki saǵat 21:00-diń shamasynda bastalǵan boran tań ata bir-aq saıabyrlady. Ádette tótenshelikter qatty borannyń bolatynyn, jeldiń jyldamdyǵy kúsheıetinin aldyn ala habarlaýshy edi. Sirá, atalǵan qyzmet ókilderi men aýa raıyn anyqtaýshylar bul joly kútpegen jerden, ótken qys aılarynyń ózinde bolmaǵan borannyń bastalyp ketetinin boljaı almaı qalǵan sekildi, deıdi Oral qalasynyń turǵyndary. Shalǵaıdaǵy Qaztalov jáne Bókeı Ordasy aýdandarynan jetken habarlarǵa qaraǵanda, alaǵaı da bylaǵaı qatty jel, boran kezinde kókten túsken qardy úrlep, úptep, eldi mekenderdiń irgesine tyqsyryp, úıip tastaǵan. Qardyń úıler men ákimshilik ǵımarattardyń esik, terezelerin basyp qalǵany sonshalyq,tańerteń syrtqa shyǵatyn esikterdi ashýdyń ózi qıynǵa túsken. Al ishine emes, syrtqa qaraı ashylatyn esikterdi ashý tipti múmkin bolmady, dep habarlady Qaztalov aýdanyndaǵy áriptesimiz Serik Jumaǵalıev. Mine, sóıtip, keshegi kúni naýryzdyń aqshaqary Aqjaıyq atyrabyn belýardan keletin aq kórpege orady da tastady. 14 naýryz kúni respýblıkanyń batys óńirinde kórisý aıt merekesi bastalyp, naýryz keldi, kóktem keldi, dep el-jurt qýanysyp júrgende, beıne bir qys mezgili qaıta kelgendeı kórinis oryn aldy. Degenmen, keshe borannyń beti qaıtyp, kún qaıtadan jylynyp, qar erı bastady. Qalaı bolǵanda da ylǵaldyń mol túskeni jaqsy. Kóktemde ylǵaldyń mol bolýy bolashaq yrys kózi. Ári bul qubylys jyldyń jaqsy bolatynynyń bir habarshysy, dep jatty óńirdegi kónekóz qarııalar. Temir Qusaıyn. Derek: egemen.kz. Sýret: stranamam.ru.