Aqtóbede qyzdarǵa arnalǵan qazaq-túrik lıseıi ashylady

AQTО́BE. 16 naýryz. Aqtóbede qyzdarǵa arnalǵan qazaq-túrik lıseıi ashylady. Atalǵan jaıt oblys ákimi Berdibek Saparbaevtyń KATEV halyqaralyq qoǵamdyq qorynyń bas dırektory Mehmet Mesýt Atamen bolǵan kezdesýinde belgili boldy. Bul týraly egemen.kz tilshisi habarlady. Jalpy KATEV halyqaralyq qoǵamdyq qory bilim berý mekemeleri jumysyn úılestirý maqsatynda Qazaqstan men Túrkııa arasyndaǵy kelisim negizinde qurylǵan bolatyn. Qazirgi tańda Qazaqstanda 29 qazaq-túrik lıseıi jumys isteıdi. Kezdesý barysynda óńir basshysy qazaq-túrik lıseıleri oqýshylarǵa olardyń áleýetin asha otyryp, sapaly bilim berýde ekenin atap ótti. Ol Memleket basshysy Nursultan Nazarbaevtyń ózi taıaýda Aqtóbege sapary barysynda Nazarbaev zııatkerlik mektebi men QTL elimizdegi myqty mektepter ekenin málimdegenin jetkizdi. Aqtóbedegi qazaq-túrik lıseıinde 200-den astam bala bilim alýda. О́z kezeginde qyz balalarǵa arnalǵan mundaı oqý orny joq. Mehmet Mesýt Ata bul olqylyqtyń ornyn toltyrý maqsatynda oblys ákiminen bos turǵan ǵımarattardyń birin qyz balalarǵa arnalǵan lıseı úshin berýin surady. Aımaq basshysy oblys ortalyǵynda qyz balalar lıseıine yńǵaıly ǵımarattyń joq ekendigin, alaıda bul máseleni sheshý úshin memlekettik-jekemenshik seriktestik tetigin paıdalaný múmkindigin jetkizdi. KATEV halyqaralyq qoǵamdyq qorynyń bas dırektoryna bul máseleni jańa QTL ǵımaraty qurylysyn birlesip júrgizý arqyly sheshý múmkindigi aıtyldy. Bul rette jergilikti bılik jer telimin berý, ınfraqurylym júrgizý jáne qurylysty ishinara qarjylandyrýdy óz mindetine alýǵa daıyn ekindigin bildirdi. Satybaldy Sáýirbaı. Derek: egemen.kz. Sýret: vk.com.