Elbasy Pavlodardaǵy «B.B.NURA» medısınalyq ortalyǵynda boldy

ASTANA. 16 naýryz. Memleket basshysy Pavlodar oblysyna jasaǵan jumys sapary barysynda «B.B.NURA» JShS nefrologııa jáne efferentti terapııa ortalyǵynda boldy. Bul týraly akorda.kz habarlady. Memleket basshysy medısınalyq palatalardy aralap, ortalyq qyzmetiniń negizgi baǵyttarymen tanysty. Sonymen qatar Qazaqstan Prezıdenti eńbek ujymy ókilderimen jáne oblystyń medısına qyzmetkerlerimen áńgimelesti. Nursultan Nazarbaev halyqtyń turmysyn jaqsartý úshin densaýlyq saqtaý salasyn damytýdyń mańyzdylyǵyna toqtaldy. «О́tken jyldar ishinde Qazaqstanda 1300 densaýlyq saqtaý nysany salyndy. Sonyń arqasynda 10 jylda ómir súrý uzaqtyǵy 72 jasqa deıin uzardy. Daǵdarysqa qaramastan, 1 qańtardan bastap biz medısına qyzmetkerleriniń eńbekaqysyn 28 paıyzǵa kóterdik. Bul ortalyqtyń memleket-jekemenshik seriktestigi arqyly salynǵany óte mańyzdy, men bul baǵytty qoldaımyn. Jumysqa qajetti jaǵdaı jasalýda, al dárigerler eldiń ıgiligine qyzmet etý úshin óz biliktilikterin arttyrýy tıis», – dedi Memleket basshysy. Mekeme qyzmetkerleri densaýlyq saqtaý salasyn damytýǵa kóńil bólip otyrǵany úshin Nursultan Nazarbaevqa alǵys aıtty, sondaı-aq, taıaý ýaqyttary Qazaqstan Prezıdentiniń tapsyrmasymen salynǵan jańa perınataldyq ortalyqtyń ashylýy josparlanyp otyrǵanyn habarlady. Sońynda Nursultan Nazarbaev jınalǵandarǵa tabys pen baq-bereke tiledi. Medısınalyq mekeme eldegi 25 apparaty bar iri dıalızdik ortalyq bolyp sanalady jáne búırek qyzmetiniń jetkiliksizdiginen zardap shegip otyrǵan naýqastarǵa tolyq nefrologııalyq kómek kórsetýge mamandandyrylǵan. Elaman Qońyr. Derek, sýret: akorda.kz.