Keshe Memleket basshysy Nursultan Nazarbaev Pavlodar oblysyna jumys saparymen bardy. Elbasy sapar aıasynda birqatar áleýmettik nysandardy aralady. Solardyń biri – «B.B.NURA» JShS nefrologııa jáne efferentti terapııa ortalyǵy. Nursultan Nazarbaev onda medısınalyq palatalardy aralap, ortalyq qyzmetiniń negizgi baǵyttarymen tanysty. Elbasynyń nysandardy aralaý sátinde oblys ákimi Qanat Bozymbaev qasynda erip júrdi.
Medısınalyq mekeme eldegi 25 apparaty bar iri dıalızdik ortalyq bolyp sanalady jáne búırek qyzmetiniń jetkiliksizdiginen zardap shegip otyrǵan naýqastarǵa tolyq nefrologııalyq kómek kórsetýge mamandandyrylǵan. Atalǵan ortalyq 2015 jylǵy qazan aıynda iske qosylǵan bolatyn. Quny 337,7 mln. teńgeni quraıtyn joba búginde qyryq shaqty adamdy jumyspen qamtyp otyr. Onda jyl saıyn dıalızben 100 adam em ala alady.
Joba memlekettik-jekemenshik áriptestik sheńberinde júzege asyrylǵan. Ortalyqta sozylmaly búırek jetispeýshiligine shaldyqqan naýqastarǵa dıagnoz qoıýdan bastap búırek almastyrýǵa deıingi kezeńder boıynsha qyzmet kórsetiledi. Transplantasııadan keıingi kezeńde saýyqtyrý qyzmeti qosa atqarylady. Efferentti terapııanyń jańa ádisteri engizilýde. Sondaı-aq, halyqaralyq sapa standarttaryn qamtamasyz etý, nefrologııalyq qyzmettiń tolyq sıklyn qurý, otandyq densaýlyq saqtaý salasyna álemdik kóshbasshylardyń ınvestısııalaryn tartý búginde bul ortalyqtyń basym maqsattarynyń biri bolyp otyr.
Elbasy ortalyq jumysymen tanysqan soń eńbek ujymy ókilderimen jáne oblystyń medısına qyzmetkerlerimen áńgimelesti. Nursultan Nazarbaev sóz arasynda halyqtyń turmysyn jaqsartý úshin densaýlyq saqtaý salasyn damytýdyń mańyzdylyǵyn aıryqsha atady.
«О́tken jyldar ishinde Qazaqstanda 1300 densaýlyq saqtaý nysany salyndy. Sonyń arqasynda 10 jylda ómir súrý uzaqtyǵy 72 jasqa deıin uzardy. Daǵdarysqa qaramastan, 1 qańtardan bastap biz medısına qyzmetkerleriniń eńbekaqysyn 28 paıyzǵa kóterdik. Bul ortalyqtyń memleket-jekemenshik seriktestigi arqyly salynǵany óte mańyzdy, men bul baǵytty qoldaımyn. Jumysqa qajetti jaǵdaı jasalýda, al dárigerler eldiń ıgiligine qyzmet etý úshin óz biliktilikterin arttyrýy tıis», – dedi Memleket basshysy.
Mekeme qyzmetkerleri densaýlyq saqtaý salasyn damytýǵa kóńil bólip otyrǵany úshin Nursultan Nazarbaevqa alǵys aıtty. Sońynda Nursultan Nazarbaev jınalǵandarǵa tabys pen baq-bereke tiledi.
Pavlodar – densaýlyq saqtaý salasynyń damýyna aıryqsha kóńil bólip otyrǵan óńirlerdiń biri. Onyń jarqyn mysaly retinde ótken jyldyń sońynda Prezıdenttiń tapsyrmasymen oblystyq perınataldyq ortalyqtyń eń zamanaýı quraldarmen jabdyqtalǵan 100 oryndyq jańa korpýsy paıdalanýǵa berilgenin aıtýǵa bolady. Taıaý ýaqyttary jańa perınataldyq ortalyqtyń ashylýy josparlanyp otyr. Ortalyqta 9300 ana em alyp, 5800 sábı dúnıege kelse, endi jylyna 13 myń anaǵa joǵary sapaly medısınalyq kómek kórsetýge jáne 8 myń sábıdiń dúnıege kelýine múmkindik týady. Oblystyń aýyldyq aýdandarynda 7 dárigerlik ambýlatorııa salyndy. Al joǵaryda atalǵan nefrologııa jáne efferentti terapııa ortalyǵy óńirdiń ǵana emes, búkil respýblıka kólemindegi aıryqsha medısınalyq jetistik bolyp otyr.
Prezıdent Nursultan Nazarbaev, sondaı-aq, jumys sapary barysynda Pavlodar arnaıy ekonomıkalyq aımaǵynda ornalasqan «ÝPNK-PV» munaı koksyn qyzdyrý zaýyty» JShS-ne atbasyn burdy. Memleket basshysy zaýyt jumysymen tanysyp, Elbasyna ındýstrııalyq-ınnovasııalyq damý memlekettik baǵdarlamasynyń júzege asyrylý barysy men «Pavlodar» arnaıy ekonomıkalyq aımaǵynyń jumysy týraly baıandaldy. Qazirgi ýaqytta «Pavlodar» arnaıy ekonomıkalyq aımaǵynda 4 kásiporyn jumys júrgizýde, taǵy 8 joba júzege asyrylýdyń túrli kezeńinde tur. Taıaý arada birqatar jańa nysandardy, sonyń ishinde agrohımııalyq ónimder, jaǵarmaı materıaldary óndiristerin, sondaı-aq, hımııa-metallýrgııa keshenin iske qosý josparlanyp otyr.
Elbasy «ÝPNK-PV» JShS jumysshylarymen, shaǵyn jáne orta bıznes ókilderimen kezdesti. Áńgime barysynda Memleket basshysy eldiń ındýstrııalyq damýyndaǵy óńirdiń eleýli rólin atap ótti.
«Pavlodar – Qazaqstannyń qýatty ónerkásip ortalyǵy. Sizder jumys isteıtin óndiristiń mańyzy óte zor, óıtkeni, ol osynda óndiriletin ónimdi syrttan ımporttaýdan qutqardy. Endi ony ózimiz eksporttaımyz. Elektrolız zaýyty ózimizdegi munaı koksy arqyly jumys isteıdi, al sizder osyndaı aldyńǵy qatarly kásiporynda eńbek etesizder. Qazaqstandy ındýstrııalandyrý degenimiz – osyndaı kásiporyndar salý», – dedi Nursultan Nazarbaev.
Qazaqstan Prezıdenti elektr energetıkasynda kómir qoldanatyn bizdiń el úshin aýaǵa taraıtyn zııandy zattardy tazartý jáne ekologııany saqtaý asa mańyzdy másele ekenin de aıtty. Zaýyttyń jas mamandary óz kezeginde Elbasyna eldegi jasalǵan jaǵdaı úshin alǵystaryn aıtty. О́zderiniń Prezıdenttiń «Bolashaq» baǵdarlamasymen shetelde oqýǵa múmkindik alyp, qazirgi kúni týǵan elderinde eńbek etip jatqandaryn maqtanyshpen jetkizdi.
Munaı koksyn qyzdyrý zaýyty 2015 jyldyń jeltoqsanynda iske qosylǵan bolatyn. Quny 22,975 mlrd. teńge bolatyn óndiris oshaǵy 2015-2019 jyldarǵa arnalǵan «Bıznestiń jol kartasy-2020» baǵdarlamasy boıynsha óńirlik ındýstrııalandyrý kartasyna engizilgen. Kásiporyn óndiristegi gaz qaldyqtarynyń jylýy esebinen ózin ózi tolyqtaı elektr energııasymen qamtamasyz etedi. Pavlodar munaı-hımııa zaýytynda óndiriletin munaı qaldyǵy, ıaǵnı koks buǵan deıin Reseıdiń kásiporyndaryna satylatyn. Al Qazaqstan alıýmınıı zaýyty qanatty metaldy balqytýda qoldanylatyn anod bloktaryn reseılik jáne qytaılyq óndirýshilerden satyp alyp otyrǵan. Endi ózimizdiń kásiporyn «joǵymyzdyń» ornyn toltyrmaq. Koksty qyzdyrýǵa arnalǵan zaýytty Qytaıdyń NFS halyqaralyq tústi metallýrgııa ınjenerlik-qurylys kompanııasy jobalaǵan. Negizgi tutynýshy «Qazaqstan elektrolız zaýyty» AQ bolǵanymen, onyń ónimi endi Qytaı jáne Reseıdiń alıýmınıı ónerkásibimen aınalysatyn kásiporyndaryna da eksportqa shyǵarylmaq.
Iri kásiporyn 309 adamǵa jumys ornyn ashty. Jobanyń qýaty birinshi kezeńde jylyna 140 myń tonna bolsa, ekinshi kezeńde 280 myń tonna bolady dep kútilýde. Iаǵnı, atalǵan joba óńirdiń ındýstrııalyq qýatyna aıryqsha serpin qosatyn ekonomıkalyq nysan bolyp otyr.
Pavlodar oblysy – eldiń ındýstrııalyq damýyna aıryqsha úles qosyp otyrǵan óńirlerdiń biri. Máselen, statıstıkalyq derekterge súıensek, oblys boıynsha Indýstrııalandyrý kartasynyń birinshi besjyldyǵyna engizilgen kásiporyndar 180 mlrd. teńgeniń ónimin óndiripti. Eksport kólemi 100 mlrd. teńgeden asqan. Endi bastalǵan ekinshi besjyldyqta oblysta ınvestısııalardyń jalpy kólemi 443,2 mlrd. teńgeni quraıtyn jańa nysandar tizbesi qosylǵan. Jyl qorytyndysynda bul kásiporyndar quny 40 mlrd. teńge bolatyn ónimdi syrtqa shyǵarǵan. Bul kúnderi 800 mlrd. teńgeden astam qarjy salynǵan 20-dan astam joba iske asyrylýda. Bıyl quny 25 mlrd. teńge turatyn 11 joba josparlanýda. Olardyń arasynda temirjol beldikteri men dóńgelek juptaryn shyǵarý, energetıkalyq mashına jasaý óndirisi, agrohımııalyq ónimderdi shyǵarý, eki ónerkásip jylyjaıy bar.
Elbasy Nursultan Nazarbaevtyń keshe Pavlodar oblysyna jumys sapary tústen keıin bastalsa da úsh birdeı nysandy aralap úlgerdi. Aıtalyq, Memleket basshysy Pavlodar memlekettik pedagogıkalyq ınstıtýtynyń jańa jataqhanasyna bardy. El Prezıdentin stýdentter zor qýanyshpen qarsy aldy. Qazaqstan Prezıdenti jataqhanada kúndelikti turmys pen demalys úshin barlyq jaǵdaı jasalǵanyn kórdi. Soǵan oraı, Nursultan Nazarbaev respýblıkada jastardy qoldaý men olardyń bilim alýy máselelerine udaıy kóńil bólinetinin, sonyń ishinde bul jumys «Serpin-2050» memlekettik baǵdarlamasy aıasynda da atqarylyp jatqanyn atap kórsetti. Jataqhana jastary Prezıdenttiń ómir jolyn ózderine úlgi tutatyndaryn aıtyp, «Bolashaqta Siz sııaqty elge eńbegimizdi sińirýge barymyzdy salamyz» desti.
500 adamǵa arnalǵan páter úlgisindegi jataqhana 2015 jyly ashylǵan. Onda «Serpin» baǵdarlamasy boıynsha oqıtyn 300 stýdent turady. Ǵımaratta demalýǵa arnalǵan bólmeler, medısına kabıneti, jattyǵý zaly, jeke zattardy saqtaıtyn qoıma, tehnıkalyq orynjaılar jáne múmkindigi shekteýli stýdentter úshin arnaıy jabdyqtalǵan bólmeler bar.
Elbasynyń Pavlodar oblysyna jumys sapary búgin ári qaraı jalǵasady. Nursultan Nazarbaevtyń respýblıkalyq eńbek ujymdary forýmyna qatysýy josparlanǵan.
Dınara BITIKOVA,
«Egemen Qazaqstan».
Pavlodar oblysy.
