Sulýy men jylýy birdeı kosmetıka

Elimizde áıelder kosmetıkasy óndirile bas­tady. Kez kelgen saýda ortalyqtarynda samsap turatyn sheteldiń sapasyz taýarlarynan kóp nárse joq. Áıelder qaýymy osynaý ónimderge qarajatyn aıamaı jumsaıtyny ras. Endi mine, óz elimizde shyǵaryla bastaǵan kosmetıkany alyp, birinshi kezekte el ekonomıkasyna úles qosýǵa jáne otandyq ónimdi senimdi túrde qoldanýǵa negiz bar. Shyqqanyna az ǵana ýaqyt bolsa da úlken suranys pen qyzyǵýshylyq týdyryp otyrǵan «Aısaýle» kosmetıkalary jóninde joba jetekshisi, hımııa ǵylymdarynyń kandıdaty, dosent  Sáýle MUSAEVANYŃ ózinen suraǵan edik. – Sáýle hanym, áıelderdiń kúndelikti tutynatyn kosmetıkasyn elimizde jasap shyǵarý týraly tyń ıdeıa qalaı paıda boldy? – Kosmetıka degende, bizde bet kútimine arnalǵan maskalar men kremder shyǵarylady. Bilim jáne ǵylym salasynda eńbek ete júrip, men kóbine ózimizdiń ońtústik óńirde ósetin ósimdik shıkizattaryn, ıaǵnı dárilik shópter men dándi-daqyldardy zertteı bas­tadym. Jasy qyryqqa kelgen áıelderdiń bet kútimin, jastyǵyn saqtap qalýy týraly kópten oılanýshy edim. Bul rette ózimdi de mysalǵa alýǵa bolady. Sebebi, kóptegen názik jandylardyń boıynda bar jaǵdaı, ártúrli kosmetıkalarǵa sezimtaldyq meni de syrt aınalyp ótpedi. Betimniń terisi qurǵaq, kez kelgen kremniń jaǵa bermeıtini bar. Osy máseleniń tolǵandyratyny sonsha, jan-jaqty ǵylymı ádebıetterdi, sheteldiń jańalyqtaryn zerttep júrdim. Baıqaǵanym, kóbinese Japonııa, Koreıa jáne kórshiles Qytaı memleketiniń halqy óziniń jergilikti jerinde ósetin emdik shópterinen daıyndalǵan ónimdi paıdalanady eken. Jáne onyń aǵzaǵa áseri de jaqsy. Sodan ózimizdiń Ońtústik Qazaqstan óńiriniń ekologııalyq taza aımaqtarynda ósetin dárilik shópter men dándi-daqyldardyń untaǵyn belgili quramda Lactobacillusplantarum mıkroorganızminde fermentteý, ıaǵnı ashytý arqyly betke jaǵatyn jańa maska jasap shyǵardym. Bul ónimdi ekijarym jyldaı ǵylymı-táji­rıbeden ótkizdim. Keıinnen ınnovasııalyq patent aldym. Daıyn bolǵan mas­kany ózime tájirıbe retinde kúndelikti tutyna bastadym. Nátıjesin kórgen qurbylarymnyń qolqa salýymen ony ózgelerge usynýdy qolǵa aldym. Qyz-kelinshekterdiń kóńilinen shyǵyp, biri ekinshisine aıtyp, suranys pen usynystar túse bastady. Aqyr sońynda tipti de úlgermeýge aınaldym. Sol sebepti ózimniń sińlim Záýreni kómekke shaqyrýǵa týra keldi. Onyń marketıng baǵytynda jumys tájirıbesi mol bolatyn. Ol oqytýshylyq qyzmetin birjola tas­tap, isimdi jandandyrý úshin meniń janyma keldi. 2012 jyldyń qarasha aıynan bastap jeke kásipkerlik ashyp, jumys jasap kelemiz. Úkimet tarapynan shaǵyn jáne orta bıznesti qoldaý boıynsha «Damý» kásipkerlikti damytý baǵdarlamasy týraly estip, «Shymkent ınnovasııa» JShS-ne habarlastyq. 2013 jyly osy atalǵan uıymnyń atynan «Bıznestiń jol kartasy-2020» baǵdarlamasy sheńberinde Úkimet qaýlysymen bekitilgen memlekettik granttyń ıegeri atandyq. Sodan mine, otandyq tabıǵı «Aısaýle» kosmetıkasyn óndiretin óndiristiń tehnologııalyq jelisi quryldy. – Bul ónimderdi jasaý barysynda eli­mizdegi shıkizat qoldanylatyndyǵyn aıtyp óttińiz. Onyń erekshelikteri aıtpasa da belgili, ıaǵnı tabıǵı shópter qashanda adamzatqa tek paıdasyn tıgizip keledi. De­sek te, osy maskalar men kremderdiń ózge ónim­derden nendeı artyqshylyqtary bar eke­nin ózińizden bilsek? – Iá, tek qana shópter qoldanylady. Maskanyń tolyq daıyn bolýyna 4 kún ýaqyt ketedi. Bul kúrdeli tehnologııalyq prosess. Ol uqyptylyqty, shydamdylyqty qajet etedi. Maskalarymyz bıologııalyq belsendi qospalardan aıryqsha úılesimmen jasalǵan formýladan turady. Bet terisiniń maskaǵa táýeldi bolyp qalý qaýpi joq, qosymsha qospalar aralastyrylmaıdy. Ekologııalyq taza ári júz paıyz betti nárlendiredi. Bul rette emdik qasıetteri týraly tipti bólek aıtýǵa bolady. Mysaly, bezeý, papıllomdar (súıelder), bettegi qara daqtarǵa qarsy, ekologııaǵa baılanysty bettiń erte qartaıýynan saqtaıdy. «Aısaýle» ǵajaıyp maskasynyń ózi ekige bólinedi: 35 jasqa deıin jáne 35 jastan keıin. Bul eki maskany tabıǵı boteks dep ataýǵa ábden bolady. Taýarlarymyzdyń quny óte qoljetimdi. Ekonomıkalyq daǵdarysta ónimniń baǵasyn ósirmeýdi qadaǵalap otyrmyz. Sebebi, bizdiń shıkizatymyz jáne qara­paıym quty-ydystarymyz Qazaqstanda shyǵarylýda. Qazirgi tańda maskalardan bólek túrli aýrýlarǵa em bolatyn shóp shaılar men sýsabyndar jáne sabyndar da shyǵarýdamyz. «Aýyryp em izdegenshe, aýyrmaıtyn jol izde» degen sózdiń mánin uqsaq ta tereńine úńile bermeımiz. Shamadan tys táttini, tuzdy jáne maıly taǵamdardy, qospasy bar azyq-túlikti paıdalanamyz. Sonyń áserinen aǵzaǵa kúsh túsedi de, boıda jınalǵan artyq tuzdar, maılar, toksınder ýaqytyly boıdan tazartyp otyrmaǵandyqtan keselge aınalady. Sol úshin aǵzamyzǵa belgili emdik shópterdiń jıyntyǵynan quralǵan shóp shaılar iship, aǵza qyzmetine járdemdesip otyrǵan jón. Kóp jyldan beri maman retinde shópterge hımııalyq taldaý jasaı kele, shóp quramyndaǵy emdik zattardyń bir-birimen úılesýine erekshe mán bere bastadym. Oǵan sebep – shaıdy demdeý kezinde keıbir shópterden bólinetin paıdaly zattar jıyntyq quramyndaǵy basqa shópterdiń paıdasyn álsiretip, keıde múldem joıyp jiberýi múmkin. Kerisinshe, keıbir shópter basqa shópterdiń boıyndaǵy emdik elementterin kúsheıtip, erekshe bir úılesimge keledi. Shópterdiń ara-qatynasy, mólsheri erekshe mańyzǵa ıe. Men emdik shóp shaılar qurastyrǵanda, osy jaǵyna erekshe nazar aýdaramyn. Bir adamdardyń shópke allergııasy bolady, olardyń ishpegeni abzal. Desek te, ondaı jaǵdaılar óte sırek. – Tutynýshylaryńyz sizderdiń taýardy joǵary deńgeıde baǵalap, erekshe qyzy­ǵý­shylyq tanytyp jatqandyǵyn áleý­mettik jelilerden baıqap júrmiz. Ásirese, áıelder jaǵy sizderdiń ónimdi qalaı, qaıdan tabatyndyǵyn jappaı surastyrýda? – Bizdiń tutynýshylarǵa, meni qoldap-qýattap otyrǵan jandarǵa rızashylyq bildirgim keledi. Osydan birer jyl buryn «Qazaqstan» telearnasyndaǵy «Áıel baqyty» baǵdarlamasyna qatystym. Sol arqyly búkil qazaqstandyqtar bizdiń ónim jaıynda habardar bolyp, tilektestik bildirdi. Sodan beri elimizdiń biraz qalasynda taratýshy-kómekshilerimiz jumys jasaýda. Mysaly, Astana, Atyraý, Aqtaý, Almaty, Qyzylorda, Aqtóbe jáne t.b. qalalar men aımaqtarda jumys isteımiz. Suranys berilgen jaǵdaıda ónimderdi termo-sómkelermen jiberýdemiz. Sheteldiń qymbat kosmetıkasynan góri tabıǵı otandyq ónimderdiń paıdaly ekenin halyq túsine bastady. Bizdiń óndirýshi sehymyz jáne keńsemiz Shym­kent qalasynda ornalasqan. Oblystyq kásip­kerler palatasynyń qoldaýymen Sary­aǵash shıpajaıynda dúńgirshegimiz jumys jasaýda. – Mólsher boıynsha kúnine nemese aıyna qansha kólemde ónim óndiriledi? – Joǵaryda aıtyp ótkenimdeı, ónimder qospasyz tabıǵı ónim ári tek tońazytqyshta saqtalatyn bolǵandyqtan qajetti tapsyrysqa qaraı óndiriledi. Qazirgi ýaqytta biz tek tapsyryspen jumys isteımiz. – Otandyq taýardy qoldaý boıynsha elimizde kóptegen baıqaýlar men saıys­tar uıymdastyrylyp turady. Osyndaı jo­balarǵa qatysyp, ózderińizdiń ónimderińizdiń ba­ǵyn synap kórdińizder me? – Birneshe jyldan beri belsendilik tanytyp kelemiz. Mysaly, ótken jyly Kásipkerler palatasynyń uıymdastyrýymen ótken OQO-daǵy taýarlar kórmesine qatysyp, oblys ákiminiń alǵys hatymen jáne zattaı syılyǵymen marapattaldyq. Odan bólek, Almaty qalasynda ótken 10-shy halyqaralyq sulýlyq ındýstrııasy «Suluexpo-2015» kór­mesine qatystyq. Astana qalasynda Jergilikti qamtýdy damytýdyń ulttyq agenttigi «NADLoC» AQ-tyń uıymdastyrýymen ótken «Qazaq­standa jasalǵan» kórme-jármeńkesine qatysyp qaıttyq. – Birinshiden, otandyq ónim, ekinshiden, aǵzaǵa zııandy qospalary joq jáne úshin­shiden, qalta kóteretin bolǵandyqtan jurt jaqsy qabyldady. Biraq, osy tusta ár ónim­niń syrtynda jazylyp turatyn fır­manyń aty, ıaǵnı «Aısaýle» sózi birqa­tar tutynýshylardy oıǵa salǵanyn baı­qa­dyq. Áste, otandyq ónimniń aty da qa­zaqy qalypqa saı «Aısáýle» bolǵanyn qalaı­tynymyz ras. Bul máselege qalaı qaraısyz? – О́te oryndy suraq. Ádilet organynyń sheshimimen «Aısaýle» atty taýarlyq belgimizge oń sheshim aldyq, qujatymyz bar. «Aısaýle» taýarlyq belgisi bizdiń ónimdi rastaıtyn qujat. Alǵashqyda taýarlyq belgide «Aısaýle» dep jazylyp ketti. Kósh júre túzeledi demekshi, aldaǵy ýaqytta ózgertýge tyrysamyz. – Bolashaqta jumystaryńyzdy qaı baǵytta jandandyrý josparda bar? – Bolashaqta óndiristiń sheńberin keńeıtý jáne onda jumys jasaıtyn jumysshylardyń sanyn arttyrý birinshi kezekte tur. Soǵan baılanysty alda áli atqarylatyn jumystar kóp. Bizdiń jeke kásipkerlik bıznesti damytýdyń jolynda keledi. Bizde birneshe seh ashylǵaly tur, sol úshin oblystyq ındýstrııalyq ortalyqtan jer alý máselesi kún tártibinde. Taýarymyzdyń qutylaryn jáne etıketkalaryn zamanaýı deńgeıge kóterý qajet. Shymkent qalasynda «Aısaýle – tabıǵı otandyq kosmetıka» degen brendpen dúken ashyp, sol dúkendi Qazaqstannyń basqa qalalarynda da kóbeıtýdi kózdep otyrǵan jaıymyz bar. Bul rette ınvestorlardy tartý – bas­ty maqsattardyń biri. Aradaǵy birneshe jyldar bizge tabysqa jetý úshin kóp eńbektenýdi úıretti. Bizdiń elde kásipkerlerge, bıznes bastaǵysy keletin árbir adamǵa múmkindik mol. Tek izdenis pen eńbek qajet. Elbasymyz aıtqandaı, «О́z ıgiligiń úshin eńbek etseń, halyqtyń da ıgiligi artady» degen ustanymmen kelemiz. – Áńgimeńiz úshin rahmet. Áńgimelesken Elmıra MÁTIBAEVA, «Egemen Qazaqstan».