Muǵalim bedeli

Ol artpaı, oqý sapasy jaqsarmaıdy Bilim salasynda qaǵıdaǵa aınalyp ketken osy másele Qostanaı memlekettik pedago­gıka­lyq ınstıtýtynda ótken «Altyn­sarın oqýlary» ǵylymı-praktıkalyq konfe­ren­sııasynyń da ózegine aınaldy. Kemeńger ustaz Ybyraı Altynsarın «Muǵalim – mek­teptiń júregi» degen eken. Rasynda, qan­daı jaqsy oqýlyq, kompıýterlik synyp, ozyq jabdyq bolsa da balanyń sapaly bilim alýy úshin muǵalimniń mańyzy joıylmaq emes. Áńgime ustazdyń deńgeıin qalaı kótermek kerek? Jas urpaqty sapaly bilimmen sýsyndatý úshin ne isteýge tıispiz? Konferensııaǵa qatysýshylar osy oı tóńireginde pikir almasty. Respýblıkalyq deńgeıde ótken konferensııaǵa birinshi ret elimizdegi Nazarbaev zııatkerlik mektepteriniń muǵalimderi qatysty. Konferensııanyń osy aımaqtaǵy ustaz­dar ustahanasy Qostanaı memlekettik peda­gogıkalyq ınstıtýtynda ótýi de tegin emes. Bilim ordasy jyl saıyn pedagog mamandardy ushyrýmen qatar, ustazdar bilimi men biliktiligin kóterý jumystaryna belsendi, jan-jaqty jumystar júrgizip otyrady. Osy joly basqosýǵa qatysqan mektep muǵalimderi, ádiskerler, joǵary oqý ornynyń oqytýshylary mundaı konferensııanyń ótýi óte qajet ekenin aıtty. – Qazir bilim salasy ınnovasııalyq, ıntegrasııalyq úderisterdi bastan keship otyr. Mektepke deıingi mekemelerden bastap jańǵyrtý, qaıta qalyptastyrý jumystary júrip jatqanda bilimberýdiń zııatkerlik, ınnovasııalyq mektepter, joǵary oqý oryndary sekildi ártúrli mekemeleriniń ózara qarym-qatynasy, úndesýi, tájirıbe almasýy óte mańyzdy bolyp sanalady. Mysaly, osy konferensııaǵa úzdik baǵdarlamamen jumys isteıtin Nazarbaev zııatkerlik mektepteri mamandarynyń qatysýy muǵalimderdi jan-jaqty damytý isinde jaqsy jańalyqtyń biri der edim. Olar óz tájirıbelerimen bólis­pek, – dedi Qostanaı memlekettik pedagogıka ınstıtýty pedagogıka kafedrasynyń meń­gerýshisi, pedagogıka ǵylymdarynyń kandıdaty Bıbigúl О́tegenova. Konferensııada baıandama jasaǵan Pedagog­tik sheberlik ortalyǵy Qostanaı qalalyq fılıalynyń dırektory Elena Onıshenko – Halyqaralyq tájirıbe kórsetkendeı, muǵalimniń oqytý sapasy oqýshylardyń aldaǵy barlyq bilim alý progresin anyqtaıtyn mekteptegi basty faktor bolyp tabylady. О́sip bara jatqan balanyń qaıta bilim alýǵa ýaqyty joq, sondyqtan muǵalimniń ár kúni, ár sabaǵy oqýshy úshin mańyzdy. Ol sapaly bolsa – oqýshynyń aldaǵy tabystarynyń sheti kóringendeı bolady, sapasyz bolsa, oqýshy sol kúnnen bastap utylady, – dedi ol. Konferensııada muǵalim bedeli, bilim sapasyn kóterý problemalary jan-jaqty aıtyldy. Qostanaı memlekettik pedagogıkalyq ınstıtýtynda bul jóninen ıgilikti jumystar atqarylyp keledi. Akkredıtteý boıynsha jaqsy kórsetkishke qol jetkizdi. Búginde ınstıtýt reıtıng boıynsha elimizdegi peda­go­­gıkalyq joǵary oqý oryndary arasynda tórtinshi oryndy ıelenedi. Instıtýt prorektory Erkin Ábil konferensııada sóılegen sózinde jaqsy muǵalim máselesin talapkerden, stýdentter qabyldaýdan bastaý kerektigin aıtty. Biraz jyldardan beri pedagogıka ıns­tıtýttaryna ózge mamandyqqa tisi batpaǵan, ortasha oqıtyn jastardyń kele salatyny, keıin olardyń kóbisiniń júrek qalaýynsyz oqyp shyqqan mamandyǵyna barmaı, basqa jumys izdep ketetini de tanys kóriniske aınalǵan. Erkin Ábil sońǵy jyldary ınstıtýtta oblys­tan túsetin talapkerler sanynyń azaıyp ketkendigin de tilge tıek etti. – 2004 jyly ınstıtýtta bilim alatyn jas­tardyń 10 paıyzy syrt oblystardan keletin. 2012 jyly olardyń úlesi 17 paıyzǵa kóterildi. Qazir bilim ordasyndaǵy stý­dentterdiń 33 paıyzy ózge oblystardan kelip oqıdy. Bul bir jaǵynan ınstıtýttyń reıtınginiń joǵary ekeninde bolsa kerek. Degenmen, aýyldyq jerlerdegi, shalǵaı eldi mekenderdegi shaǵyn komplektili mektepterdiń jaǵdaıy bolashaq muǵalim kadrlaryn oblys­taǵy turǵylyqty jastardan daıyndaý kerek. Shaǵyn komplektili mektepter úshin qos pándi ıgergen muǵalimder daıarlaýdyń da tıimdiligi bar. Munyń barlyǵy da bilim sapasyna ózindik yqpalyn tıgizedi, – dedi Erkin Amanjoluly. Konferensııanyń seksııalyq jumysynda Nazarbaev zııatkerlik mektepteriniń muǵalim­deri óz tájirıbelerin ortaǵa saldy. Názıra JÁRIMBETOVA, «Egemen Qazaqstan». QOSTANAI.