Kórermendi tolǵandyrǵan týyndy

Kókshetaý qalasyndaǵy «Dostar» mádenıet saraıynda «Qazaqstan» ulttyq telearnasynyń Táýelsizdigimizdiń 25 jyldyǵyna arnalǵan tól týyndysy, halyq aqyny Jambyl Jabaevtyń 170 jyldyq mereıtoıy qarsańynda túsirilgen «Jambyl» tarıhı dramasynyń tusaýkeseri bolyp ótti. «Qazaqstan-Kókshetaý» tele­arnasynyń uıymdastyrýymen ótken sharaǵa kórermender kóp jı­naldy. Qazaqstan Jazýshylar odaǵy Aqmola oblystyq fılıa­lynyń tóraǵasy Tólegen Qajy­baı, oblystyq ishki saıasat basqar­masynyń bólim basshysy Asylbek Baıajuma kózi tirisinde-aq ańyzǵa aınalǵan aqyn jóninde tebirenisti tálim tókti. Jınalǵan qaýymnyń nazaryna 4 bólimdi dramadan turatyn bir jarym saǵattyq fılm usynyldy. Shyǵarma jelisinde jyr dúldúliniń ómir joly ǵana emes, tutas ulttyń taǵdyry sýrettelgen. Drama bala Jambyldan dana Jambylǵa deıingi san qı­ly oqıǵalardy qamtıdy. Sony­men qatar, 1936 jyly Qazaq­stann­yń óner qaıratkerleri men ádebıetshileriniń Máskeýde ótken qazaq ádebıeti men óneriniń onkúndigine barǵan sapary da áde­mi kórinis tapqan. Aqyn ǵumyrnamasyndaǵy tyń derektermen de tánti etedi. Ataǵy dúril­degen Súıinbaı aqyndy pir tutyp, batasyn alǵan malshynyń balasy Jambyl sóz ónerimen el arasyna tanylyp, Burym atty qyzǵa ǵashyq bolý hıkaıasy nanymdylyǵymen tartymdy. Jambyl óz zamanynda halqy­nyń muńyn muńdap, joǵyn joqtaı bildi. Ásirese, Keńes ókimetiniń solaqaı saıasatynan qazaqtyń zııaly qaýym ókilderi qýǵyn-súrginge ushyraǵanda jyr jampozynyń judyryqtaı júregi qan jylap, qasiret shegýi, sondaı-aq, súıikti uly Alǵadaıdy Uly Otan soǵy­sy­na attandyrýy óte áserli berilgen. Fılmde teatr jáne kıno ártisi Baıǵalı Esenálıev Jambyl Jabaevtyń shynaıy obrazyn naqpa-naq jetkize bilgen. Al, aqyn ómir súrgen kezeńdi dálme-dál kórsetý úshin paıdalanylǵan Jambyl murajaıynyń jıhazdary men tutynǵan zattary, oǵan tartý etilgen «ZIM-1» avtokóligi de qyzyqtyra túsedi. Kókshe kórermeni rejısser Ánýar Raıbaevtyń sátti fılminen tereń tolǵam túıip, rýhanı órleý seziminde bolǵany anyq. Baqbergen AMALBEK, «Egemen Qazaqstan». Aqmola oblysy.