ASTANA. 19 naýryz. Naýryz merekesi qarsańynda Qazaqstannyń Halyq jazýshysy, dramatýrg Qaltaı Muhamedjanovtyń týǵan aýyly Syrdarııa aýdanyna qarasty Shirkeılide eskertkish bıýsti ashyldy. Bul týraly oblys ákimdiginiń baspasóz qyzmetine silteme jasaǵan egemen.kz tilshisi habarlady.
Sharaǵa oblys ákimi Qyrymbek Kósherbaev qatysyp, syrdarııalyqtardy Naýryz merekesimen quttyqtady.
«Naýryz merekesin eldik mańyzy zor, tárbıelik máni bar sharadan bastap otyrmyz. Alashtyń anasy atanǵan Syr eli ult tarıhy men rýhanııatymyzda erekshe orny bar, talaı qaıratkerler men zııalylardy týǵyzǵan qasıetti topyraq. Syrda týyp, qazaqtyń Qaltaıy atanǵan ataqty dramatýrgqa qoıylǵan eskertkish aýyl kórkine kórik qosyp, jastardyń boıynda patrıottyq sezim qalyptastyratyny anyq. Osy qýanyshtaryńyz qutty bolsyn! Jyl basy otbasylaryńyzǵa amandyq, baq-bereke tileımin», – dedi oblys ákimi Qyrymbek Kósherbaev.
Aıta keteıik, merekege oraı ortalyq alańda kúres, gir tasyn kóterý sııaqty sport túrlerinen jarystar uıymdastyryldy. Aýyl turǵyndary úshin ónerpazdar konsert qoıyp, kelgen qonaqtar kıiz úılerden dám tatty.
Talǵat Raıymbek.
Derek, sýret: egemen.kz.
