Astana «Jer saǵaty» dúnıejúzilik ekologııalyq aksııasyna qatysty

ASTANA. 20 naýryz. Keshe Astana qalasy «Jer saǵaty» halyqaralyq aksııasyna qatysty. Álem boıynsha mıllıardtaǵan adam planetamyzdyń bolashaǵyna nemquraıly qaramaýdyń belgisi retinde óz úıleri men páterlerinde jaryq pen elektr quraldaryn bir saǵatqa óshirdi. Sonymen qatar, basty obektiler men týrıstik kórikti jerlerde de jaryq sóndirildi. Bul týraly Astana qalasy ákimdiginiń resmı saıty – astana.gov.kz-ke silteme jasaǵan egemen.kz tilshisi habarlady. Astanada saǵat 20:30-21:30 aralyǵynda 300-den astam ǵımarattyń syrtqy jaryqtandyrylýy toqtatyldy. Sonyń ishinde «Báıterek» monýmenti, «Han Shatyr» oıyn-saýyq ortalyǵy, Beıbitshilik jáne kelisim saraıy, «Astana Opera» memlekettik opera jáne balet teatry syndy ǵımarattar bar. Sonymen qatar, sharaǵa «Qazaqstan» sport kesheni, «Alaý» muz aıdyn saraıy, «Barys Arena» sııaqty sporttyq nysandar da qosyldy. M.Gorkıı atyndaǵy memlekettik akademııalyq orys drama teatry, elordalyq sırk, Q.Qýanyshbaev atyndaǵy qazaq mýzykalyq drama teatry, «Jastar» saraıy, qýyrshaq teatry men «Naz» bı teatry da aksııaǵa qoldaý kórsetti. «Jer saǵaty» – Dúnıejúzilik jabaıy tabıǵat qorynyń (WWF) barsha álemde júzdegen memleketti qamtyǵan jáne tabıǵatty saqtaýdyń, planetamyzdyń shekteýli resýrstaryna qamqor bolýdyń belgisi bolyp tabylatyn aýqymdy aksııa. Aıta keteıik, ótken jyly aksııaǵa 172 memleket pen 2 mıllıardtan astam adam qatysqan. Elaman Qońyr. Derek, sýret: astana.gov.kz.