ASTANA. 19 naýryz. Búgin Astanada mánerlep syrǵanaýdan Keńes Odaǵynyń úsh dúrkin Olımpıada chempıony Irına Rodnına jas sportshylarmen kezdesti.
Kezdesý «Alaý» muz saraıynda ótti. Onda qalanyń jas mánerlep syrǵanaýshylary álemniń on dúrkin chempıony keledi degende ataqty sportshyny kórýge asyǵa jetti. Osy kúni Irına Rodnınanyń ýaqyty tyǵyz bolǵanymen jastarmen emin-erkin áńgimelesip, suraqtaryna jaýap berdi. Sodan keıin ol balalardyń jattyqtyrýshylary men ózderine 1,5 saǵat boıy sheberlik sabaǵyn ótkizdi.
«Maǵan kezdesý óte unady. Muz saraıy da jaqsy salynǵan eken. Al balalardyń ózderi qandaı ádemi, talapty. Men olardyń arasynan Olımpıada chempıony shyǵatynyna senemin. Eń bastysy balalardy jaqsy daıyndaý kerek. Men Qazaqstanǵa saılaýdyń baıqaýshysy retinde keldim. Qazaqstannyń bolashaǵy jarqyn bolady dep oılaımyn. Kelesi joly taǵy kelemin. Sol kezde sportshylarmen jáne Sport mınıstrligi basshylyǵymen kezdesemin», dedi ol.
Irına Rodnına 1972 jyly Alekseı Ýlanovpen, 1976, 1980 jyldary Aleksandr Zaısevpen birge ekeýilep mánerlep syrǵanaýda Olımpıada chempıony atanǵan. Reseıdiń Memlekettik dýmasynyń «Edınaıa Rossııa» partııasynyń atynan saılanǵan V-VI shaqyrylymynyń depýtaty. Qoǵam qaıratkeri. «Edınaıa Rossııa» partııasy bas keńesiniń múshesi.
Dastan Kenjalın.
Derek, sýret: Mádenıet jáne sport mınıstrligi Sport jáne deneshynyqtyrý isteri komıteti.
[caption id="attachment_30370" align="aligncenter" width="448"]
[/caption]
