Halyqaralyq baıqaýshylar saılaý barysyna oń baǵa berýde

ASTANA. 20 naýryz. Búgin Reseıden kelgen halyqaralyq baıqaýshylar jýrnalısttermen Parlament Májilisi men elordalyq máslıhat depýtattaryn saılaý barysy týraly óz pikirlerimen bólisti. Bul týraly Astana qalasy ákimdiginiń resmı saıty – astana.gov.kz-ke silteme jasaǵan egemen.kz tilshisi habarlady. Sarapshylar daýys berý prosesin muqııat baqylaýda, olar saılaý adal jáne aıqyn ótip jatyr, adamdar ózderiniń azamattyq ustanymdaryn belsendi túrde bildirýde dep esepteıdi. Kezdesý barysynda Máskeý halyqaralyq ýnıversıteti janyndaǵy halyqaralyq ıntegrasııalyq yntymaqtastyq ınstıtýtynyń dırektory Igor Fılkevıch Qazaqstan halqyn kele jatqan Naýryz meıramymen quttyqtap, kóktemgi jańarý merekesi men Parlament Májilisi jáne elordalyq máslıhat depýtattaryn saılaýynyń sáıkes túskendigin atap ótti. «Halyqtyń kóńil kúıi jaqsy. Saılaý ýchaskelerindegi baqylaý kórsetkendeı, barlyq partııalarǵa birdeı jaǵdaılar jasalǵan, olardyń barlyǵy jahandyq ekonomıkada, sondaı-aq, Eýrazııalyq ekonomıkalyq odaq aıasynda Qazaqstannyń damýyna barynsha kúsh salmaq», – dedi Igor Fılkevıch. Reseı Federasııasynyń eńbek sińirgen sýretshisi, professor Nıkas Safronov ta óz pikirin bildirdi. «О́tken jyly Prezıdent saılaýynda boldym, adamdar saılaýǵa zor yntamen keledi. Halyq eń úzdik, laıyqty kandıdatty tańdaıdy. Bári de zańdy ótip jatyr, eshbir buzýshylyqtardy baıqaǵan joqpyz. Aıta keterlik jaıt, adamdar óz memleketin, óz Prezıdentin jaqsy kóredi jáne osy memleketti basqaratyn adamdardy tańdaıdy», – dedi ol. «Saıası zertteýler ınstıtýty» JShQ bas dırektory Sergeı Markovtyń atap ótýinshe, partııalar arasyndaǵy básekelestik asa joǵary, túrli partııalar qatysyp jatyr, olar óz baǵdarlamalaryn usynýda. G.V.Plehanov atyndaǵy Reseı ekonomıka ýnıversıteti rektorynyń keńesshisi, ekonomıka ǵylymdarynyń doktory Marııa Valovaıa saılaýdyń barlyq halyqaralyq standarttar boıynsha uıymdastyrylǵanyn atap ótti. «Bári de jaqsy, uıymdastyrýshylar tarapynan da, daýys berýshiler jaǵynan da. Adamdardyń saılaýdy merekedeı qabyldaýy eki faktordyń belgisi: memlekette kóp is atqaryldy jáne adamdar tańdaý jasaý qajettiliginiń jaýapkershiligin túsinedi. Memleket aldyndaǵy kúrdeli josparlardy tek laıyqty komandamen ǵana júzege asyrýǵa bolady», - deıdi baıqaýshy. Aıta keteıik, búgin elimizde Parlament Májilisi men barlyq deńgeılerdegi máslıhat depýtattaryn saılaý ótip jatyr. Elorda turǵyndary 178 saılaý ýchaskesinde saǵat 20:00 deıin daýys bere alady. Elaman Qońyr. Derek, sýret: astana.gov.kz.