El bolashaǵy úshin mańyzy zor

Parlament Májilisi jáne barlyq deńgeıdegi máslıhattar saılaýyn qadaǵalaýǵa bir myńǵa jýyq halyqaralyq baıqaýshy tirkelse, olardyń bir legi Qyzyljar óńirinde júr. Biz Reseıdiń Túmen oblysy saılaý komıssııasynyń tóraǵasy Igor HALINDY S.Muqanov atyndaǵy ámbebap kitaphanada ornalasqan №635 saılaý ýchaskesinde jolyqtyryp, ótip jatqan saıa­sı naýqan barysy jaıly oı bólisken edik. – Igor Nıkolaevıch, Qazaq­standaǵy saılaý naýqandaryna reseılikter únemi úlken qy­zyǵýshylyq tanytady. Onyń syry nede dep oılaısyz? – Eske sala keteıin, byltyr Qazaqstan Prezıdentiniń kezekten tys saılaýyn qadaǵa­laýǵa Túmen jaǵynan jıyrmadan astam baıqaýshy kelip, daıyndyq jumystaryna, daýys berý barysy men daýystardy sanaý rásimine joǵary baǵa bergen bolatyn. Eshqandaı zańbuzýshylyqtardyń oryn almaǵanyn tirkegen. Bul joly da osy úrdisten aýytqymaǵanyna, barǵan saıyn demokratııalyq qundylyqtardyń ornyǵa túskenine anyq kóz jetkizip otyrmyz. Qazaqstan men Reseıdiń shekaralas aımaqtaryndaǵy saılaý organdary arasyndaǵy qarym-qatynas pen yntymaqtastyqtan utarymyz kóp. Osynda keler aldynda saılaýǵa ázirlik júrgizý týraly aqparattarmen tanystym. Básekeli dodada baǵyn synaýdy uıǵarǵan barlyq partııalarǵa teń quqyqtar men múmkindikterdiń berilýi, aqparattyq úgit-nasıhat sharalary sheńberinde birdeı qoljetimdiliktiń bolýy túrli saıası uıymdar arasynda ózara túsinistikke, birlikke, ortaq maqsat jolyndaǵy kúsh-jigerdi bir arnaǵa tolyqtyrýǵa jol ashatyny, aýqymdy reformalar men baǵdarlamalardy iske asyrýǵa jeteleri sózsiz. Bul jaǵynan Qazaqstannan úırenerimiz kóp. Men 2004 jyldan beri saıası naýqandardy qadaǵalaýǵa úzbeı qatysyp kelemin. Tájirıbemnen anyq biletinim, jyl ótken saıyn sizderde saılaý júıesi jetildirilip, zańnama aıasynda ótip keledi. Saılaýshylardyń belsendiligi de asa joǵary. Ásirese, mundaı qasıetterdi jas­tar arasynan jıi kezdestirýge bolady. Demokratııalyq úrdisterdi damytyp, qalyptastyrý jaǵynan Táýelsiz Memleketter Dostastyǵy arasynda alǵa shyǵatyndaryńyz talas týdyrmaıdy. – Oǵan jergilikti jerlerden naqty mysaldar keltire alasyz ba? – Árıne. Oblys ortalyǵy men aýdandardaǵy saılaý ýchaskelerine atbasyn tiregenimizde saılaýǵa ázirliktiń joǵary deńgeıde uıymdastyrylǵanyn, saılaýshylar qarasynyń moldyǵyn, olardy óz Otanynyń bolashaǵy, óskin urpaqtyń erteńgi ómiri beıjaı qaldyrmaıtynyn ańǵarǵanymdy atap ótkim keledi. Túske deıin 17 saılaý ýchaskesine baryp, úlkenmen de, kishimen de emen-jarqyn tildestik. Qaı-qaısysynyń bolsyn kóńil-kúıi erekshe. Máselen, Petropavl qalasyndaǵy temirjol kolledjinde ornalasqan № 705 saılaý ýchaskesinde tańǵy saǵat 10-ǵa deıin barlyq saılaýshylardyń úshten biri óz tańdaýlaryn jasap úlgirgenine kýá boldyq. Kabınalar jetkilikti. Kezekte irkilis joq. Bizdiń mıssııamyzda alǵa qoıǵan ustanym– kemshilik-olqy­lyqtardy termeleý emes, kerisinshe, saılaýdy uıymdastyrý jumystaryn jiti baqylaý, úlgi alar jańalyqtar men bas­tamalardy boıymyzǵa sińirý, oıǵa toqý, tájirıbege aınaldyrý. Osy turǵydan baǵa beretin bolsaq, Parlament Májilisi men oblystyq, aýdandyq, qalalyq máslıhattar saılaýy ádiletti, halyqaralyq talaptarǵa sáıkes ótip jatty dep batyl aıta alamyn. Eń bastysy, Qazaqstanda áleýmettik ahýal, ekonomıkalyq ósim ornyqty. Munyń bári adam­dardyń kóńil-kúıi men ómir súrý sapasyna aıtarlyqtaı áser etedi. Búgingideı qaıshylyqty, kúrdeli geosaıası jaǵdaıda el tutastyǵy úshin tańdaý jasaýdyń mańyzy zor.  Áńgimelesken О́mir ESQALI, «Egemen Qazaqstan».  Soltústik Qazaqstan oblysy. Sýretti túsirgen Amangeldi BEKMURATOV.