Eldiń belsendiligi tańǵaldyrdy

«Syrt kóz – synshy» deıdi, bul rette keshe bolyp ótken saılaý barysyn halyqaralyq sarapshylar kózimen baǵamdap kórelik. Olar ne deıdi eken? Osy oraıda, 20 naýryzdaǵy Parlament Májilisi depýtattarynyń kezekten tys saılaýyn qadaǵalaýǵa kórshiles Reseıden kelgen sarapshy Leonıd SLÝSKIIDI áńgimege tartqan bolatynbyz. – Leonıd Edýardovıch, Qazaqstandaǵy saılaý barysyn kórshi memleketten kelgen maman retinde qalaı baǵalaısyz? – Suraǵyńyzǵa naqty ári tııanaqty jaýap berer bolsam, birinshi kezekte Qazaqstandaǵy saılaýdy biz syrttaǵy saılaýlarmen emes, osy eldiń ózinde, buryn bolyp ketken saılaý kezimen salystyratynymyzǵa nazar aýdarǵan jón. Mysaly, bir jyl burynǵy Prezıdent saılaýyn atap ótýge bolady. Qazaqstan ýaqyt sanap saılaý júıesin konstrýktıvti túrde jetildirip keledi. Al búgingi saılaý barysyn kóterińki kóńil-kúı men pozıtıvti betburysqa baǵyttalǵan jaǵdaıda ótti deýge negiz bar. Daýys berý barysy, ıaǵnı saılaý úderisi adamdar úshin barynsha yńǵaıly boldy. Saılaý ýchaskeleriniń yńǵaıly ornalasýy tipti bólek áńgime. Halyqtyń daýys berýge degen joǵary deńgeıdegi yntasy, olardyń umtylysy tańǵaldyrdy. Jurtshylyq jappaı tańǵy saǵat 7-den bastap kishkenteı balalarymen, nemerelerimen kelip jatty. Barlyǵynyń kózinde qýanysh, boıynda jaýapkershilik júgi ańǵarylady. Merekelik kóńil-kúıdiń lebi esedi. Halyq Qazaqstandaǵy Parlament saılaýyn Prezıdent Nursultan Nazarbaevtyń reformalarynyń mańyzdy elementi retinde qabyldaıdy. Qazaqstan xalqynyń saılaýǵa degen qyzyǵýshylyǵy biz oılaǵannan da joǵary boldy. – О́zińiz aıtyp otyrǵandaı, halyq jappaı daýys berýge ynta bildirdi. Iаǵnı, barlyǵy joǵary deńgeıde ótti. Degenmen, saılaý úderisi kópshiliktiń kelýinen turatyndyqtan, qandaı da bir olqylyqtar, zańbuzýshylyqtar men túsinispeýshilikter baıqaldy ma? – Men eshqandaı da zańbuzýshylyq áreketterin baıqaǵan joqpyn. Barlyǵy saılaý normalaryna saı boldy. Saılaý barysynda birde-bir olqylyq oryn almady deýge tolyq negiz bar. Bizdi qushaq jaıa qarsy alǵan qazaqstandyqtarǵa rızashy­lyǵymdy bildiremin. Barlyǵy joǵary dárejede uıymdastyrylǵan. Biz tek qana oń nátıjelerdi kórip otyrmyz. Birneshe saılaý ýchaskesinde boldyq, azamattardyń saılaý barysyndaǵy áreketteri zań boıynsha júzege asty. Joǵaryda aıtqanymdaı, kedergiler men kemshilikter baıqalmady. Qazaqstan halqyna aldaǵy ýaqytta tek ósip-órkendeı berińizder degim keledi! – Rahmet. Áńgimelesken Elmıra MÁTIBAEVA, «Egemen Qazaqstan».