Ashyq, demokratııalyq saılaýdyń kýási boldyq

О́zbekstan men Qazaqstan tarıhı sabaqtastyqtaǵy baýyrlas kórshiler. Sondyqtan, biz táýelsiz Qazaqstannyń qaryshty qadamdaryna árdaıym tilektestik nıette júremiz. Maǵan ShYU mıssııasynyń ókili ári О́zbekstan Olıı Májilisi halyqaralyq ister jáne parlamentaralyq baılanystar komıtetiniń múshesi retinde Qazaqstandaǵy saılaýǵa baıqaýshy bolyp qatysý usy­nylǵanda qýana qabyldadym. О́zbekstan 2014 jyldyń jel­toqsanynda Parlament saılaýyn ótkizdi. Bizge de kóptegen elderden halyqaralyq baıqaýshylar keldi. Bul meniń de saılaý júıesinde birshama tájirıbe jınaqtaýyma septigin tıgizdi. Iаǵnı, Qazaqstandaǵy saılaýdy salystyrmaly túrde baıqaýyma múmkindik týǵanyn aıtqym keledi. Astanadan shyqqan bizder Qazaqstannyń kórkem óńiri – Býrabaıdan jumysymyzdy bastadyq. Aýdan ortalyǵyndaǵy qazaq orta mektebindegi saılaý ýchaskesi der kezinde saılaýshylardy saltanatty jaǵdaıda qarsy aldy. Respýblıkanyń Ánuranyn tyńdadyq. Onyń áýezinde rýhtandyrýshy qýat bar. Keshe ǵana bulyńǵyr kó­ringen aýa raıy da jaınap, kelýshilerdiń kóńilin shýaqqa bólep turdy. Odan keıin Býrabaı kentinde, Zelenyı bor poselkesinde bol­ǵanymyzda da birinshi bolyp daýys bergen kisige, saıası naýqanǵa tuńǵysh ret qatysýshy jastarǵa syı-sııapat kórsetý dástúri barlyǵyna tánti boldyq. Saılaý ýchaskeleri memlekettik rámizdermen bezendirilip, talap deńgeıinde jabdyqtalǵan. Shaǵyn dámhanalar uıym­das­tyrylyp, konsertter qoıy­lyp jatty. Jurt­shylyq emen-jarqyn kóńilmen amandasyp, óziniń azamattyq paryzyn kóńil serpilisi ústinde oryndaýmen boldy. Oqshaý kórinis, olqy dúnıe baıqalmady. Oblys ortalyǵy Kók­she­t­aýǵa kelgenimizde de osyndaı jarqyn kóńil aýanynda boldyq. «Kókshetaý» mádenıet saraıynyń qos qabatynda eki saılaý ýchaskesi ornalasypty. Saılaýdy ótkizýge ja­ýapty adamdarmen, de­pýtat­tyqtan úmitkerlerdiń senimdi ókilderimen, jergilikti qo­ǵamdyq baıqaýshylarmen pikirlesip, daýys berý barysymen tanystyq. Belsendilik joǵary eken. Daýys berý ashyq, erkin jáne demokratııalyq sıpatta ótip jatty. Munyń barlyǵy respýblıkanyń saılaý týraly zańyna, halyqaralyq normalarǵa saı keledi. Tájikstannan kelgen áriptesim ekeýmiz tús aýa Kókshetaýdaǵy №1 orta mekteptegi jáne «Dostar» mádenıet saraıyndaǵy saılaý ýchaskesinde bolǵanymyzda saı­laýshylardyń 60 paıyzǵa jýyǵy daýys berip úlgergenin bildik. Aqparattyq stend te uıymdastyrylǵan eken. Ha­lyqtyń qoǵam ómirindegi ma­ńyzdy oqıǵaǵa belsene qaty­satyndyǵy olardyń óz eli­niń saıası ómirinen beıtarap turmaıtynyn baıqatady. Qa­zaqstannyń táýelsizdik jyl­daryndaǵy jarqyn tabystaryn osymen baılanystyrýǵa bolady. Saılaý erteńgi bo­la­shaq­tyń senimdi kirpishin qalaýmen birdeı oqıǵa. Bul sezim qazaqstandyqtardyń júregin terbetip turatyny jaqsylyqtyń belgisi. Respýblıka Parlamenti Májilisi men jergilikti más­lı­hat­tardyń saılaýy Naýryz meıramymen tuspa-tus kelýiniń ózindik tereń máni bar dep oılaımyn. О́ıtkeni, el qýanyshy eselenip turǵandaı kórindi. Jyldyń jańarýymen eldiń jańarýy da qatar júretini anyq. Jalpy, Naýryz barshamyzǵa ortaq mereke. Merekelerińiz qutty bolsyn!  Oıbek JUMAEV, Shanhaı yntymaqtyq uıy­mynyń ókili. Jazyp alǵan Baqbergen AMALBEK, «Egemen Qazaqstan».  Aqmola oblysy.