Táýelsizdik jyldarynda elimizde 19 jańa teatr ómirge keldi

Bul týraly keshe Ortalyq kommýnıkasııalar qyzmetiniń baspasóz alańynda ótken basqosý barysynda Mádenıet jáne sport mınıstrligindegi Mádenıet jáne óner isteri departamenti dırektorynyń orynbasary Nurbolat Ahmetjanov málimdedi. – Búgingi tańda elimizde 52 mem­lekettik teatr qyzmet atqara­dy. Sonymen birge, 10 jekemen­shik teatrlar óz qyzmetin júrgizip jatyr. Táýelsizdik jyldar­ynda elimizde 19 jańa teatr ashyl­ǵan. Árıne, bul aýyz toltyryp aıtarlyqtaı jetistik. Jáne de, 6 teatrǵa (Oral, Qaraǵandy, Astana, Qostanaı, О́skemen, Shymkent) jańa ǵımarat salyndy. Qazirgi ýaqytta bizdiń teatrlardyń basty maqsattarynyń biri – básekege qabiletti, joǵary sapaly spektaklderdi shyǵarý bolyp tabylady. Sondaı-aq, teatrlardyń repertýarlaryn tolyqtyrý úshin Mádenıet jáne sport mınıstrliginiń tarapynan «Táýelsizdik tolǵaýy» konkýrsy dástúrli túrde jyl saıyn ótkizilip otyrady. Sol konkýrs nomınasııalarynyń biri teatr ónerine arnalǵan. Ár jyldaǵy jeńip shyqqan shyǵarmalar bizdiń teatrlarda qoıylyp keledi. Sondaı-aq, Mádenıet jáne sport mınıstrligi respýblıkalyq bıýdjet qarjysynan teatr mamandaryn alys-jaqyn shetel teatrlarynda taǵylymdamadan ótýge jiberip turady. Bul da memleket tarapynan jasalyp otyrǵan qoldaý ekenin eskergen durys, – dedi Nurbolat Ahmetjanov. Jıynǵa qatysqan Qazaq­stan­nyń halyq ártisi, Q.Qýanyshbaev atyn­daǵy memlekettik akade­mııalyq Qazaq mýzykalyq drama teatrynyń kórkemdik jetek­shisi Talǵat Temenov búgingi jas dra­matýrgterge kóńili tolmaıtynyn jetkizdi. – О́kinishke qaraı, búginde 30 jasqa deıin dúrildep shyq­qan jas dramatýrgter joqtyń qasy. Sebebi, pesaǵa tólenetin qala­maqy basqa salalarǵa qaraǵanda, áldeqaıda az. Mysaly, Keńes kezinde árbir pesanyń qala­maqysy bir kóliktiń quny bolatyn. Búgingi jas jigit aılap otyryp pesa jazyp, tıyn-teben alǵannan góri, bir klıpke úsh bet ssenarıı jazyp, 10 myń dollarǵa deıin tabys tapqandy jón kóredi, – deıdi T.Temenov. «Árıne, T.Júrgenov atyn­daǵy óner akademııasynda, As­ta­nadaǵy óner ýnıver­sı­tetinde dra­matýrgterdi daıar­­laıdy. Olarǵa múıizi qaraǵaıdaı drama­týrgter sabaq beredi. Biraq, ókinishke qaraı, sol drama­týrgterdiń sah­naǵa pesa ákelip, qoıyp jatqan­dary saýsaq­pen sanar­lyq. Biz, árıne, jas talanttar, jas dra­ma­týrgter, jas rejıs­serler­diń kelgenin qalaı­myz. Olar­dyń kópshiligi, eń aldymen, tele­vızııaǵa ketedi. Siz­derdiń orta­laryńyzda talaı jaq­sy dramatýrgter júr», – dep jýrnalıster qaýymyna qarata, ashy bolsa da aqıqatty jetkizdi belgili rejısser. Raýan QAIDAR, «Egemen Qazaqstan».