Batys Qazaqstanda qar qursaýynan 40 adam qutqaryldy

ORAL. 18 naýryz. Batys Qazaqstan oblysynda qar qursaýynda qalǵan 40 adam qutqaryldy. Bul týraly batysnewskz.kz-ke silteme jasaǵan egemen.kz tilshisi habarlady. Oqıǵa Shyńǵyrlaý aýdanyndaǵy Qotankól men Qaıyńdy eldi mekenderiniń arasynda bolǵan. Bul jóninde 16 naýryz kúni Oral shekara otrıadyna qarasty «Shyńǵyrlaý» shekara komendatýrasyna tótenshe jaǵdaı bóliminen habar kelip túsken. Kóktem keldi dep jaıbaraqat jolǵa shyqqan turǵyndar qystyń aqtútek boranyna tap bolypty. «Qar mólsheriniń kóp túskeni sonshalyq, adam boıynan bıik bolǵan. Qutqarý jumysyna jergilikti qojalyqtar da kómek kórsetken. Abyroı bolǵanda, eshkim úsikke shalynyp, zardap shekpeı, otbasylarymen aman-esen qaýyshty. Tilsiz jaýdyń qursaýynan shyqqandar shekarashylarǵa zor alǵys bildirip otyr», – deıdi Oral shekara otrıadynyń 20/29 áskerı bóliminiń ókili Manarbek Qarakenov. Shekarashylardyń aıtýynsha, 40 adamnyń 20-sy mektep oqýshylary. Sondyqtan jedel kómek uıymdastyrylyp, jeńil brondalǵan kóp maqsattaǵy qutqarý kóligine tıelgen jyly kıimder men ystyq tamaq dalada qalǵandarǵa jetkizilgen. Qalyń qarǵa batqan kólikterdi súırep shyǵarýǵa týra kelgen. Temir Qusaıyn. Derek, sýret: batysnewskz.kz.